DILI, 19 agostu 2021 (TATOLI)—Pesoál saúde na’in 46 ne’ebé hala’o knaar iha munisípiu Manufahi no Liquiça infetadu COVID-19.
Hosi númeru ne’e na’in 32 mai hosi munisípiu Manufahi no na’in 14 hosi munisípiu Liquiça.
Notísia relevante:COVID-19: óbitu ida, pozitivu 278 no ativu 2.729
“Ami halo teste swab hahú hosi horisehik no ohin mai deteta pesoál saúde na’in 32 mak infetadu COVID-19,” Diretora serbisu saúde munisípiu Manufahi, Florência Tilman Cortereal, informa ba jornalista Agência Tatoli via telefónika, kinta ne’e.
Númeru infetadu hosi munisípiu ne’e, mai hosi postu saúde Turiskai hamutuk na’in-lima no sira seluk hosi Same-villa.
Pesoál saúde infetadu hanesan médiku, enfermeiru, parteira no mós cliner, oras ne’e daudaun sira hala’o ona izolamentu iha uma Kablaki hamutuk na’in 17 no sira-seluk iha uma Polo Manufahi.
Tuir planu, bainhira kazu aumenta makás parte serbisu saúde Manufahi sei la fó atendiementu ba komunidade tanba bele fó perigu ba pasiente-sira seluk ka komunidade.
“Tanba ne’e mak komesa ohin ha’u fó-sai ona ba programa hotu-hotu katak, ami sei kansela treinamentu hosi nasionál, bainhira kazu menus ona mak bele aselera fali,” nia hateten.
Nune’e mós Diretora serbisu saúde munisípiu Liquiça, Apolonia dos Santos, via telefónika informa, profisionál saúde iha sentru saúde Liquiça-villa hamutuk na’in 14 mak infetadu COVID-19.
Hosi númeru ne’e iha, sentru saúde Liquiça Villa iha médiku na’in-haat, sira seluk enfermeiru, balun pesoál ambulánsia, tékniku aliadu no analista.
Tanba ne’e, parse servisu saúde husu fali pesoál saúde hosi postu saúde sira atu fó-apoiu fali iha sentru saúde ne’e.
“Bainhira kazu ne’e sa’e makás iha sentru saúde maka ami provizóriu taka ba konsulta baibain no ami sei atende de’it sira iha emerjénsia. Maibé ba sentru saúde Maubara no Bazartete no postu balun sei kontinua hala’o atendimentu ba komunidade hanesan baibain,” nia esplika.
Jornalista: Felicidade Ximenes
Editór: Cipriano Colo
