DILI, 20 agostu 2021 (TATOLI)—Ministru Agrikultura no Peska (MAP), Pedro dos Reis, hateten, hanesan parte ministériu implementadór Cesta Bázika, sei rezolve lista reklamante iha tempu badak nia laran.
“Ministériu ne’e hola parte iha munisípiu Bobonaro, felizmente nia distribuisaun konklui ona iha fulan-abríl, maibé iha reklamante 2.800 resin, tanba ne’e ami koko ko’alia ho Ministru Koordenadór Asuntu Ekonómiku (MKAE) no Vise-Ministru Turizmu, Komérsiu no Indústria (MTKI) atu MAP bele rezolve iha tempu badak,” Ministru dehan ba Agência TATOLI, iha Kuartél Jerál FALINTIL-Forsa Defeza Timor-Leste (F-FDTL), Fatuhada, sesta ne’e.
Notísia relevante: PN husu Governu selu reklamante Cesta Bázika
Tuir Ministru, hafoin komunika ho MKAE, husu atu rezolve lalais to’o loron 31 agostu.
Antes ne’e, MAP kontrata empreza hamutuk 40 hodi sosa no distribui produtu, ne’ebé hahú atividade distribuisaun iha fulan-dezembru 2020 no finaliza iha fulan-abríl 2021.
MAP simu alokasaun orsamentu $5.780.100 ba implementasaun programa hodi sosa produtu agríkola no fahe iha suku 47 munisípiu Bobonaro, ba benefisiáriu hamutuk 106.782.
Empreza ne’ebé partisipa iha programa hosi parte MAP, iha 16 mak hetan ona pagamentu ho totál millaun $2,7, enkuantu empreza 24 seluk tama pagamentu faze daruak, ne’ebé dokumentu hotu submete ona ba parte Ministériu Finansa (MF).
Bazeia ba dekretu-lei númeru 48/2020, 07 outubru, kona-ba medida apoiu família, atribuisaun Cesta Bázika, operadór ekonómika lokál iha ámbitu planu rekuperasaun ekonómika no kria rejime espesiál aprovizionamentu ba efeitu, iha artigu 10 kona-ba modalidade aprovizionamentu, hatuur katak aprovizionametu akizisaun produtu realiza bazeia ba modalidade ajudikasaun direta to’o limite verba ne’ebé aloka ba entidade ajudikante ne’ebé ministériu indika ona.
Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu hosi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina-nuu, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.
Enkuantu ba produtu ijiene maka, sabaun, álkool jel, deterjente, eskova nehan no pasta nehan.
Jornalista : Natalino Costa
Editora : Julia Chatarina
