VIQUEQUE, 23 agostu 2021 (TATOLI)—Fundasaun Alola ho Organizasaun Mane Ho Viazaun Foun (MHVF), realiza formasaun kona-bá respeitu ba inan ho aman hodi hakbit profesór no komunidade atu prevene viólensia konta feto no labarik, iha munisípiu Viqueque.
Objetivu hosi formasaun ne’e, hodi hakbi’it manorin-na’in no komunidade atu prevene diskriminasaun jéneru no violénsia kontra feto no labarik feto, nu’udár forma komún violénsia bazeia ba jéneru, liuhosi apreende no hasa’e koñesimentu kona-bá kauza no impaktu hosi violénsia, promove atitude pozitivu sira no dezenvolve abilidade sosiál inklui emosionál.
Notísia relevante:SEII fó formasaun kona-bá orsamentu sensível ba jéneru iha Viqueque
Formasaun ne’e realiza iha eskola pré-sekundáriu-sira iha postu administrativu lima iha munisípiu Viqueque, liuliu ba inan-aman sira atu bele iha hanoin oinsá dezenvolve karákter rasik ba kontribuisaun hamenus violénsia kontra feto no labarik feto.
“Programa formasaun ne’e hanaran spot light ne’ebé finansia hosi Uniaun Eropeia (UE) no programa ne’e agora daudaun implementa iha munisípiu tolu, hanesan Bobonaro, Ermera no Viqueque,” Diretór MHVF, Américo de Araújo, hateten ba jornalista Agência Tatoli, iha suku Caraubalo, segunda ne’e.
Programa ne’e realiza hosi Fundadaun Alola ho MHVF, bazeia ba tarjetu eskola ne’ebé identifikadu hosi Ministériu Edukasaun Joventude no Desportu (MEJD).
Manuál ne’ebé utiliza iha formasaun ne’e maka, Halo Ligasaun ho Respeitu (HLR), liuhosi fasilita hodi fó hanoin ba inan-aman ne’ebé bele sensível ba jéneru hodi elimina ka halakon violénsia kontra feto no labarik feto sira.
Diretór EBC 02 Cabira-Oan, Rita da Costa Soares, agradese ba formadór hosi Fundasaun Alola no MHVF ne’ebé fó ona formasaun ba estudante sira-nia inan aman, hodi hasa’e koñesimentu ba prenvensaun violénsia haosru feto no labarik feto.
Xefe suku Caraubalho, João Pinto, konsidera formasaun ne’e la’ós atu eduka inan-aman sira, maibé hanesan fó hanoin atu bele eduka oan-sira, tanba edukasaun naun formál importante tebes.
Partisipa iha formasaun ne’e inan aman hosi estudante eskoa EBC 02 Cabira Oan hamutuk na’in-30 durante loron haat, hahú ohin to’o kinta, iha sede suku Caraubalho, postu administrativu Viqueque Villa.
Jornalista: Vitorino Lopes da Costa
Editór: Cipriano Colo
