DILI, 23 agostu 2021 (TATOLI)-Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Jerónimo, husu komunidade labele intende sala kona-ba programa dijitalizasaun Rádiu Televizaun Timor-Leste, Empreza Públika (RTTL,E.P) ne’ebé daudaun Governu halo hela instalasaun tanba programa refere Governu atu ajuda komunidade oinsá sai hosi plataforma analog ba dijitál.
“Ha’u hakarak halo esplikasaun ba públiku katak kona-ba instalasaun pakote Set Top Box (STB) hanesan antena, receiver no fiu ba komunidade liuhosi programa dijitalizasaun RTTL, E.P ne’e programa Governu Timor-Leste mak halo kooperasaun ho Governu Xina atu ajuda komunidade oinsá sai hosi plataforma analog ba fali dijitál laiha intensaun partidu polítiku ruma tanba ne’e husu ba komunidade labele intende sala,” Francisco Jerónimo hateten liuhosi konferénsia imprensa ne’ebé hala’o Salaun Gabinete de Apoiu Sosiedade Sivíl iha Palásiu Governu, Dili, segunda ne’e.
Nia dehan, komunidade tenke koopera ekipa ne’ebé Governu haruka tun ba terrenu foti dadus ba komunidade ne’ebé iha televizaun, koopera didi’ak ho sira tanba programa ida ne’e Governu nian no komunidade iha direitu atu hetan pakote STB tanba instalasaun ida ne’e rasik gratuitu la husu osan ruma.
“Daudaun ita-nia ekipa sira halo servisu hanesan rejistu komunidade ne’ebé iha televizaun, tanba antes komunidade simu STB ne’e tenke rejistu uluk no sei iha sosializasaun hosi MAPKOMS rasik ba komunidade ba iha fatin-fatin, hafoin simu pakote hotu ekipa tékniku tuir kedas halo instalasaun tanba ida ne’e oferta mai hosi Governu Xina, ne’ebé mak halo kooperasaun ho Governu Timor-Leste, ba iha dijitalizasaun RTTL, E.P,” nia hatutan.
Nia afirma, komunidade labele ta’uk tanba bainhira ekipa tun ba terrenu halo rejistu ba komunidade ne’ebé iha televizaun sei simu formuláriu hodi prienxe, hosi formuláriu refere, tahan ida fó ba komunidade ne’ebé halo rejistu ne’e, ida ba xefe Aldeia no ida haruka ba MAPKOMS, objetivu atu komunidade iha direitu ba STB ne’e.
“Tanba dijitaliza RTTL,E.P, ne’e rasik ba iha faze dahuluk komunidade atu hetan STB hamutuk 30.000 ba Munisípiu Dili, Liquiça tomak no Postu Administrativu balu hosi Munisípiu Bobonaro, Ermera no Aileu ne’ebé ita ne’ebé halo ona sosializasaun, tanba programa ne’e antes fulan novembru ramata tenke hotu ona,” nia haktuir.
Jornalista : Arminda Fonseca
Editór : Francisco Simões
