BAUCAU, 23 agostu 2021 (TATOLI)–Komandante Polísia Nasionál Timor-Leste (PNTL) munisípiu Baucau, Superintendente Xefe Armando Monteiro, informa, daudaun ne’e sidadaun hamutuk 198 ne’ebé deporta hosi Indonézia, tama ona izolamentu iha Baucau.
“Sidadaun hirak ne’e kompostu hosi feto lima no restu mane hotu, mai hosi munisípiu ualu, ne’ebé barak liu hosi Ermera hamutuk 78, Dili hamutuk 28, Suai 21, Baucau rua, Viqueque lima no restu hosi munisípiu seluk,” Superintendente Xefe, hateten, iha ninia knaar fatin, Villa nova, segunda ne’e.
Iha loron rua liubá, iha sabdu (21/08) maizumenus tuku 19:00 Otl, Komandu PNTL Baucau simu orientasaun hosi Komandu Jerál atu kria kondisaun liuhosi servisu konjunta Sentru Intergradu Jestaun Krize (CIGC, sigla portugés) Baucau, atu simu sidadaun ne’ebé utrapasa liña fronteira ho dalan ilegál durante períodu Estadu Emerjénsia nia laran.
Autoridade Polísia Indonézia kaptura sidadaun hirak ne’e, hafoin entrega ba autoridade Timor-Leste.
Nune’e, hafoin tuku 22:00 resin kalan, sidadaun deportadu to’o iha Baucau no ofisialmente simu liuhosi CIGC no daudaun utiliza Ginájiu Baucau (GOR, sigla indonéziu) sai hanesan sentru izolamentu provizóriu.
“CIGC nasionál deside Baucau sai fatin própriu no seguru tanba situasaun iha Baucau agora hakmatek, entaun urgullu ida ba ita atu promove Baucau nia unidade atu oinsá simu diferente karakterístika juventude hosi munisípiu seluk mai iha ne’e,” Armando akresenta.
Tuir Komandante PNTL Baucau, maski sidadaun hirak ne’e viola regra Estadu Emerjénsia, maibé nu’udar umanu hotu-hotu hamutuk atu tau matan, tanba hanesan Komandu nia responsablidade atu fó seguransa másimu atu sidadaun hirak ne’e hodi kumpre dever no bainhira ramata sei hein desizaun hosi nasionál hodi tuir prosesu legál ne’ebé vigora.
Nune’e daudaun ne’e, PNTL Baucau halo seguransa iha fatin izolamentu provizóriu atu sidadaun sira la sai hosi fatin ne’ebá inklui apela ba komunidade ne’ebé hela besik iha área ne’e hodi tau-matan hamutuk ho autoridade seguransa.
“Hafoin kumpre dever iha izolamentu, foin halo prosesu investigasaun hodi hatene maibé daudaun sira sei kumpre protokolu saúde,” nia hatutan.
Jornalista : Natalino Belo
Editora : Julia Chatarina
