Komunidade Covalima seidauk asesu bee-moos ho di’ak
COVALIMA, 24 agostu 2021 (TATOLI) – Servisu Munisipál Água, Saneamentu no Ambiente (SMASA), rekoñese katak iha tempu bailoron naruk, komunidade Covalima labele asesu bee-moos ho di’ak.
“Ita bele dehan la sufisiente ho volume bee ne’ebé menus iha tempu bailoron naruk, liuliu iha área urbana, tanba kanu sira hahú kedas iha tempu portugés nian,” diretór SMASA, Dody Castro Ramos, informa ba Agência Tatoli iha nia kna’ar fatin, tersa ne’e.
Iha Munisípiu Covalima depende de’it bee-matan ida iha parte Sukabilaran-ida (1) no bee-matan ida iha Lakirin tempu bailoron sempre maran.
“Ami garante de’it bee-matan iha Sukabilaran-ida (1), bee-matan iha parte Lakirin, ami labele garatidu tanba iha tempu bailoron bee-matan ne’e maran,: Dody Castro Ramos hatete.
Hosi sorin seluk, abitante Lucio Amaral hateten, iha Munisípiu Covalima bainhira iha tempu bailoron naruk difisil asesu ba bee-moos.
“Ami difisil asesu bee moos tanba volume bee moos la sufisiente hodi fornese mai ami no ami na’in buka rasik se la’e ami sosa de’it,” Lucio Amaral haktuir.
Jornalista : Celestina Teles
Editór : Francisco Simões
