DILI, 24 agostu 2021 (TATOLI)—Polísia Nasionál Timor-Leste (PNTL), munisípiu Dili, liuhosi Unidade Tránzitu, sei entrega motór hamutuk 100-resin ba Diresaun Nasionál Patrimóniu Estadu, hodi bele halo leilaun.
Antes ne’e, Polísia Tránzitu halo apreensaun ba motór hirak-ne’e tanba laiha dokumentu no balun hetan asidente, hodi aplika koima maibé na’in la ba selu hodi foti, nune’e rai de’it iha edifísiu Caicoli, besik tinan tolu ona.
Notísia relevante:PNTL sei aprezenta motorizada 400-resin atu leilaun
“Ita halo ona identifikasaun ba evidénsia sira ne’ebé envolve iha infrasaun ka involve iha asidente, nune’e sei halo pedidu ba Ministériu Públiku atu ba Tribunál. Bainhira hetan despaixu, maka sei entrega motór hirak-ne’e ba Patrimóniu Estadu,” Komandante Tránzitu munisípiu Dili, Inspetór Xefe, Domingos Sarmento Gama, hateten ba jornalista-sira iha kna’ar fatin, Caicoli, tersa ne’e.
Tuir lei kódigu estrada, bainhira viatura-sira hetan apreensaun durante loron 90 maka, na’in la mai foti sei afavór ba Estadu.
Tuir dadus hosi polísia Tránzitu Dili, hahú 2007 mai oin entrega ona motór besik 200 ba Patrimóniu Estadu.
Jornalista: Nelson de Sousa
Editór: Cipriano Colo
