DILI, 25 agostu 2021 (TATOLI)—Governu liuhosi reuniaun Konsellu Ministru (KM) iha kuarta ne’e, aprova projetu Rezolusaun Governu, ne’ebé deside aplika hikas konfinamentu domisiliáriu jerál ba populasaun iha Dili, entre tuku 00:00 loron 27 agostu to’o tuku 23:59 loron 02 setembru 2021.
Desizaun ne’e, Governu foti hafoin analiza aprezentasaun ba pontu situasaun epidemiolójika nasionál, hosi Sala Situasaun, Sentru Integradu Jestaun (CIGC, sigla portugés).
“Nune’e, impoen konfinamentu dimisiliáriu jerál ba ema hotu ne’ebé hela ka agora daudaun iha Dili, ne’ebé tenke hela iha sira-nia uma ka iha alojamentu temporáriu, ne’ebé inklui sentru akollimentu, exetu iha situasaun ne’ebé prevee iha diploma ne’e, liuliu tanba razaun saúde, serbisu, asesu ba sasán no servisu nesesidade bázika inklui simu vasina kontra COVID-19,” Ministru Prezidénsia Konsellu Ministru, Fidelis Manuel Leite Magalhães, informa, hafoin ramata reuniaun ezekutivu, iha Palásiu Governu, kuarta ne’e.
Notísia relevante: Governu hakotu konfinamentu domisiliáriu no autoriza hikas movimentu transporte públiku
Tuir Portavós Governu, halo konfinamentu domisiliáriu jerál tanba haree ba evolusaun variante delta COVID-19 iha Dili, nune’e fó biban ba entidade kompetente hodi halo esforsu no asegura katak médiku sira sei bele iha nafatin kapasidade halo serbisu no ospitál sira lapara hotu.
“Governu tenke aplika medida drástika, tanba ne’e sidadaun hotu durante loron hitu hela lai iha uma, no ne’ebé vasina dala-rua ka kompleta ona, kuandu laiha nesesidade urjente ka importante atu trata, la presiza sai hodi halo movimentu ba mai,” Ministru subliña.
Iha loron 24 agostu ne’e, durante oras 24 nia laran rejista númeru óbitu rua, pozitivu 532, rekuperadu 97 no ativu 3.816, nune’e totál kazu rejistadu hahú marsu 2020 to’o 24 agostu hamutuk 14.935.
Tuir dadus kona-ba progresu imunizasaun COVID-19, to’o loron 24 agostu, totál vasina ne’ebé fó ona iha Timor-Leste tomak hamutuk 544.175, kompostu hosi doze dahuluk 370.300 (49,1%) no doze daruak 173.875 (23%).
Enkuantu, iha Dili, totál vasina ne’ebé fó ona hamutuk 272.399, kompostu hosi doze dahuluk 155.588 (72,8%) no doze daruak 116.811 (54,6%).
Iha área hotu munisípiu Dili bandu transporte públiku, liuliu táxi, mikrolete, biskota no anguna halo sirkulasaun.
Suspende selebrasaun relijioza koletiva no bandu mós atu halo seremónia fúnebre ne’ebé envolve partisipasaun ema na’in sanulu liu no sira ne’ebé partisipa serimónia ne’e rasik tenke uza máskara oin hodi taka inus no ibun no mantein distánsia pelumenus metru ida ho ema seluk ne’ebé prezente iha seremónia ne’e.
Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustivel nian, no instituisaun finanseira sira.
Restaurante sira bele fornese hahán, aplika rejime take away ka entrega iha uma de’it no estabelesimentu seluk taka ba públiku bele dezenvolve ninia atividade liuhosi servisu entrega ba uma de’it.
Vendedór ambulante ba sasán alimentár no sasán ba nesesidade bázika bele mantein sira-nia atividade.
Enkuantu, merkadu Manleuana no Taibessi bele mantein ninia funsionamentu, hahú hosi tuku 6 dadeer to’o tuku 6 lorokraik.
Jornalista : Antónia Gusmão
Editora : Julia Chatarina
