DILI, 25 agostu 2021 (TATOLI)-–Ministériu Obra Públika (MOP) submete ona pedidu ba Ministériu Finansa (MF) atu asesu fundu empréstimu hodi reabilita estrada dirasaun Batugade bá Balibo ho distánsia kuaze kilómetru 12.
“Ami haruka pedidu ba Ministériu Finansa atu utiliza osan poupansa hosi projetu impréstimu atubele hatama ba planu reabilitasaun estrada ligasaun Batugade bá Balibo,” Ministru Salvador hateten iha Palásiu Governu, kuarta ne’e.
Tuir nia, iha sistema Governu, MF maka iha kompeténsia asesu ba fundu empréstiu, tanba ne’e tenke liu ministériu ne’e hodi bele analiza no haree fundu balun hodi hatan ba nesesidade.
Ministru rekoñese, prosesu administrativa atu asesu fundu impréstimu ne’e presiza tempu naruk, tanba presiza aprovasaun mós hosi parseriu dezenvolvimentu ne’ebé mak fó impréstimu mai Timor-Leste.
Nune’e, iha pedidu, governante ne’e husu ba MF atu muda osan iha poupansa impréstimu nia hodi aloka atu finansia estudu viabilidade ba estrada ne’e hodi avansa ba konstrusaun sivíl.
“Ha’u labele ko’alia tempu atu halo reabilitasaun ka konstrusaun bainhira, tanba depende ba burokrasia iha sistema finansiamentu ne’e rasik,” nia akresenta.
Maski MOP divulga ona programa sira, maibé tenke iha finansiamentu liuhosi Orsamentu Jerál Estadu (OJE) ka empréstimu.
Jornalista : Florêncio Miranda Ximenes
Editora : Julia Chatarina
