DILI,25 agostu 2021 (TATOLI)-Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, relata INSS hamutuk ho Banku Nasionál Komérsiu Timor-Leste (BNCTL-sigla portugés) halo ona pagamentu ba idozu no invalidés hamutuk pursentu 98 iha territóriu Timor-Leste.
Nia esplika husi benefisiáriu hamutuk ema na’in 92.207, Governu selu ona ho orsamentu hamutuk $16.576.320 no falta pursentu rua maka sei iha prosesu pagamentu ho orsamentu hamutuk $975.250 ba faze dahuluk durante tinan 2021.
Notísia Relevante :Governu halo ona pagamentu ba idozu-invalidés 97.717
“Ita bele dehan munisípiu hotu-hotu atinje 100% tanba hela de’it mak Munisípiu Baucau ne’ebé foin mak 80%, ne’e iha Postu Administrativu Quelicai nian. Depois Liquiça mós foin mak atinje 87% tanba sei falta Postu Liquiça Vila. No mós RAEOA foin 87% no sei hein Postu Ponte Makasar,” Prezidente INSS informa ba Tatoli iha Caicoli Dili, kuarta ne’e.
INSS hamutuk ho BNCTL iha ona alvu katak prosesu pagamentu ba idozu no invalidés sei finaliza iha fulan-setembru 2021.
Longuinhos adianta, tuir kalendariu pagamentu husi BNCTL no INSS ba benefisiáriu sira iha Postu Administrativu Quelicai sei finaliza iha loron 17 fulan-setembru, iha Postu Administrativu Liquiça Vila sei ramata iha loron 8 setembru, no Pante Makasar RAEOA sei finaliza iha 01 setembru 2021.
Kona-ba lista benefisiáriu hira maka mate ona, nia dehan INSS no BNCTL sei públika ba públiku hafoin prosesu pagamentu hotu-hotu ramata iha fulan setembru.
Entretantu, tuir dadus husi INSS hateten idozu no invalidés hamutuk 97.717 maka iha diretu hodi simu subsídiu iha faze dahuluk tinan 2021.
Notísia Relevante :Idózus no invalidés 406 iha Caraubalu simu ona subsídiu
Jornalista:Osoria Marques
Editór:Agapito dos Santos
