LAUTÉM, 25 agostu 2021 (TATOLI)—Sekretáriu Estadu Kooperativa (SEKoop), Elizário Ferreira, hakarak halo promosaun atividade grupu kooperativa Valusere, nune’e bele atrai ema halo vizita liután fatin turíztika iha postu administrativu Tutuala, munisípiu Lautém.
“Ha’u orienta ha’u-nia ekipa atu halo brosura kompleta ho istória Valusere, atu halo promosaun iha website Federasaun Hanai Malu, nune’e bele atrai turizta bele vizita fatin ne’e,” Sekretáriu Estadu hateten durante vizita iha fatin Kooperativa Valusere, iha Tutuala, kuarta ne’e.
Iha fatin hanesan, reprezentante Grupu Kooperativa Valusere, Idalizia de Jesus Hornai, apresia ho vizita ne’e.
“Ami kontente tanba ami hetan vizita direta hosi parte Governu, atu motiva no enkoraja ami hodi halo ami-nia atividade,” nia tenik.
Kooperativa ne’e hahú ezisténsia Haburas iha tinan 2006, hafoin nakfilak ba Grupu Kooperativa Valusere.
“Ami-nia kooperativa iha grupu haat no ami halo funsaun di’ak. Atividade ne’ebé durante ami halo iha kooperativa maka tein hodi fó han vizitante sira ne’ebé mak vizita fatin ne’e,” nia akresenta.
Maski nune’e, tuir Idalizia de Jesus, rendimentu grupu hosi Guest House tun oituan.
“Uluk semana ida ami bele hetan $700 to’o $800, maibé agora ho situasaun pandemia ne’e, vizitante menus no rendimentu tun,” nia hatutan.
Enkuantu, rendimentu hosi Guest House, Grupu Kooperativa Valusere, iha kada trimestrál, fahe malu no osan balun rai ba kofre Kooperativa hodi finansia atividade kooperativa.
Jornalista : Natalino Costa
Editora : Julia Chatarina
