SEMC sei reabilita eskola 16
COVALIMA, 26 agostu 2021 (TATOLI)-Servisu Edukasaun Munisípiu Covalima (SEMC) sei halo reabilitasaun ba eskola 16 iha Covalima.
“Atu implementa projetu ne’e, iha loron 1 setembru ne’e, ami sei realiza enkontru kona-ba atu implementa projetu 16 ne’e sei la halo tenderizasaun forma de’it ekipa komunitáriu ne’ebé jere hosi komunidade sira,” diretór Edukasaun Munisípiu Covalima, Edmundo Pereira, informa ba Agência Tatoli iha nia kna’ar fatin, Covalima, kinta ne’e.
Projetu 16 sei implementa iha Postu Administrativu Suai Villa, Zumalai, Fohorem, Fatumea no Maucatar. Eskola sira ne’ebé tama ba lista atu reabilita maka hanesan Eskola Bázika Filiál (EBF), Eskola Pre-Eskolár, Eskola Sekundáriu Jerál Suai, Eskola Tékniku Vokasionál no Eskola Báziku Sentrál (EBC) ne’ebé kompleta ho sala de aula, sala eskritóriu, armazén no toilet.
Iha 2022 to’o 2023 kontinua halo reabilita eskola sira iha Postu Administrativu hitu (7) Munisípiu Covalima ne’ebé mak seidauk konsege reabilita iha tinan ne’e.
Jornalista : Celestina Teles
Editór : Francisco Simões
