Sentru Saúde Covalima divulga medida prevensaun variante delta
COVALIMA, 26 agostu 2021 (TATOLI)- Servisu Saúde (SS) Munisípiu Covalima, finaliza ona divulgasaun informasaun ba komunidade iha aldeia 18 iha liña fronteira terrestre Timor-Leste ho Indonézia, kona-ba perigu hosi variante delta no nia medida prevensaun sira.
“Ami finaliza ona divulgasaun informasaun kona-ba medida prevensaun ba peste letál variante delta ho mós nia perigu hosi moras aat ne’e ba komunidade aldeia 18 ne’ebé viziñu ho Indonézia,” diretór Servisu Saúde Covalima, Filipe Pereira Lemos informa ba Agência Tatoli iha nia kna’ar fatin, kinta ne’e.
Servisu Saúde Munisípiu Covalima mós kontinua mantein komunikasaun ho autoridade lokál bainhira sidadaun sira haku’ur ba Indonézia liuhosi dalan ilegál tenke informa ba pesoál saúde atu bele foti medida prevensaun tuir protokolu saúde mundiál nian.
Divulgasaun informasaun ne’e hala’o iha suku sira ne’ebé pertense hotu ba Postu Administrativu Tilomar, Fohorem, Fatumea, Fatululik no Maucatar.
Iha sorin seluk, Administradór Munisípiu Covalima, Francisco de Andrade hateten, administrasaun munisípiu Covalima servisu ho ekipa saúde divulga informasaun iha área fronteira terrestre tanba iha fronteira sidadaun sira hakat ba Indonézia liuhosi dalan ilegál.
“Ami tenke foku ba iha área fronteira terrestre nune’e komunidade iha konsiénsia hodi prevene propagasaun variante delta,” Francisco de Andrade hateten.
Covid-19 hahú rejista hosi Postu Administrativu Fatumea iha Covalima, tanba ne’e presiza intensifika divulgasaun ba komunidade sira parte Fatumea nian.
Dadus hosi Ministériu Saúde iha loron 25 fulan ne’e kazu ativu COVID-19 iha Munisípiu Cavalima hamutuk ema na’in-332.
Jornalista : Celestina Teles
Editór : Francisco Simões
