COVALIMA, 27 agostu 2021 (TATOLI)-Sentru Formasaun Téknika no Komunikasaun (CEFTEC, sigla portugés) fó treinamentu ba administradór no kargu xefia sira iha Munisípiu Covalima.
“Ami hala’o formasaun bazeia levantamentu iha 2019, ami idéntika servisu administrasaun públiku iha nivel munisípiu no postu sira presiza halo kapasitasaun ba área sira hanesan diskursu públiku, mestre serimónia, téknika aprezentasaun iha semináriu ka workshop no servisu protokolu,” formadór responsavel programa formasaun, Lauriano Pereira Barreto informa ba Agência Tatoli iha Otél Vila Nova, Covalima, sesta ne’e.
“Ami nia formadu sira maioria funsionáriu públiku no funsionáriu ne’ebé mak destaka iha postu administrativu sira,” Lauriano hatutan.
Bazeia ba kalendáriu katak CEFTEC sei kontinua fó treinamentu ba matéria haat ne’e iha munisípiu sira hanesan Manufahi, Ainaro formasaun kona-ba multimedia iha Aileu, Baucau no Manatuto, maibé depende ba situasaun
Iha sorin seluk, Administradór Postu Administrativu Suai Vila, Laurentino da Silva hateten, CEFTEC fó treinamentu matéria haat ne’e relevante tebes nune’e bele simu bainaka VIP iha serimónia importante sira .
“Ha’u hanoin treinamentu ne’e importante tebes, nune’e bainhira iha serimónia nasionál ita bele halo prátika iha postu administrativu sira,” Laurentino tenik.
Jornalista : Celestina Teles
Editór : Francisco Simões
