DILI, 27 agostu 2021 (TATOLI)-Adjuntu Prezidente Autoridade Munisípiu Dili, António Moniz Calau informa, daudaun ne’e munisípiu Dili liuhosi postu administrativu sira implementa Programa Mão de Obra Postu Administrativu (PMOPA) hodi rekupera ekonomia durante situasaun pandemia COVID-19.
Programa Maõ de Obra Postu Administrativu ne’e, liuhosi diploma Ministerial númeru 12/2021 25 abríl ne’ebé mai munisípiu maibé mak fó kompeténsia ba Postu Administrativu neen iha Munisípiu Dili mak implementa.
“Nia objetivu loloos ne’e mak atu rekupera ekonómia iha situasaun pandemia COVID-19 tanba Governu hanoin oinsá atu fó empregu uitoan ba ita-nia joven sira, ka inan-aman iha suku sira,” António Calau Moniz hateten ba Agência Tatoli iha nia knaar fatin, Matadouro, Dili, sesta ne’e.
Nia afirma Programa Mão de Obra Postu Administrativu ne’e kada suku sei halo rekrutamentu ba traballadór hamutuk na’in-20 no hosi na’in-20 ne’e, na’in-19 traballadór no ida supervizór.
“Ema ne’ebé atu servisu ba PMOPA ne’e hamutuk 1.880 entaun ami orienta ona katak tenke rotativu kada fulan rekruta ema hamutuk 720, nune’e ita-nia komunidade hotu-hotu bele hetan osan uitoan hosi PMOPA,” nia dehan.
Nia esklarese, hosi komunidade ne’ebé servisu ba PMOPA ne’e ba traballadór loron ida hetan osan $5.00 ba supervizór loron ida $7.00 ne’ebé ba programa PMOP ne’e rasik orsamentu ba kada postu administrativu ne’e hamutuk $5.000 ne’ebé Postu Administrativu neen, Metinaro, Ataúro, Don Aleixo, Nain-Feto, Cristo Rei no Vera-Crus ne’e hamutuk $30.000.
Administradór Postu Administrativu Metinaro, Fausto Soares hateten, sira-nia Postu Administrativu rasik implementa PMOPA hahú iha loron 06 agostu 2021, la’o tuir orientasaun ne’ebé munisípiu fó hanesan servisu rotativu kada fulan no involve komunidade kada suku na’in-20, kompostu hosi na’in-ida supervizór no na’in-19 traballadór.
“Programa ida ne’e ita agradese tebes tanba bele ajuda ita-nia komunidade iha situasaun COVID-19 tanba ne’e ita espera katak durante pandemia COVID-19 ne’e sei eziste, Governu kontinua nafatin programa ida ne’e,” nia hateten.
Jornalista : Arminda Fonseca
Editór : Francisco Simões
