COVALIMA, 28 agostu 2021 (TATOLI)—Servisu Asuntu Sosiál Covalima, hahú fulan-juñu to’o agostu tinan ne’e, apoia ona kaixasaun hamutuk 82 ba família matebian ho kondisaun vulnerável.
“Nia prosesu apoiu kaixaun ba família vulnerável, sira tenke lori pedidu hosi suku no kopia kartaun eleitorál matebian no família ba Servisu Sosiál munisipál,” Diretór Servisu Asuntu Sosiál Covalima, Abrão Nascimento, informa ba Agência TATOLI, iha ninia knaar fatin, sábadu ne’e.
Servisu Sosiál Covalima laiha fatin hodi rai kaixaun, tanba ne’e kompañia ne’ebé halo mak rai iha armajen no bainhira Servisu Sosiál halo despaixu ba kompañia mak hasai kaixão, ne’ebé ho presu tuir medida hanesan 50×80 cm nia presu $60 medida naton $90, medida 140 to’o 200 cm $170.
“Maski Governu fó ona apoiu kaixasaun ba família vulnerável sira, maibé ita-nia komunidade sira la satisfaz tanba laiha transporte atu tula kaixaun lori ba postu administrativu sira ,” nia akresenta.
Durante ne’e, Servisu Sosiál munisipál fó apoia kaixaun barak liu iha postu Suai Villa, Maucatar, Tilomar no Zumalai, maibé postu administrativu Fatumea no Fatululik ladún tanba laiha transporte atu transporta ba postu sira
“Ami sei hato’o pedidu ba nasionál hodi husu transporte tula de’it kaixaun no transporte funeráriu lima iha postu administrativu sira. Daudaun ne’e karreta funeráriu iha rua de’it mak halo sirkulasaun iha Covalima hodi kobre iha postu administrativu hitu,” nia hatutan.
Jornalista : Celestina Teles
Editora : Julia Chatarina
