COVALIMA, 31 agusto 2021 (TATOLI)-Servisu Edukasaun Munisípiu Covalima, suspende ensinu aprendizajen prenjensiál iha Covalima durante serka sanitária bazeia ba despaixu hosi Ministériu Edukasaun juventude no Desportu (SEJD).
“Tuir despaixu hosi Ministru Edukasaun, Juventude no Desportu, Armindo Maia katak, suspende ensinu prejensial hahú iha loron 26 agostu to’o 10 setembru ne’e,” diretór servisu Edukasaun Covalim,a Edmundo Pereira, informa ba Agência Tatoli iha nia kna’ar fatin, tersa ne’e.
Governu liuhosi reuniaun Konsellu Ministru iha loron 25 fulan agostu, tinan ne’e, deside impoin hikas serka sanitária iha Munisípiu Covalima, Baucau; hahú tuku 23:59 loron 26 agostu 2021 to’o tuku 23:59 loron 08 setembru 2021 tanba haree ba evolusaun COVID-19.
Iha sorin seluk, diretór eskola Sekundáriu Jerál Públiku Francelino Carvalho hateten, eskola suspende aula prejensiál tanba Governu impoin serka sanitária iha Covalima bazeia ba númeru kazu ativu COVID-19 ne’ebé sa’e maka’as mós iha Covalima.
“Ami deside hahú aula prejensiál iha loron 13 fulan setembru ne’e,” Francelino dehan.
Estudante hosi eskola Sekundáriu Jerál Públiku ho hamutuk estudante 2,175, hosi númeru ne’e estudante ho idade 18 metade mak simu ona vasina dose dahuluk, maibé vasina ba dose daruak estudante 300-resin mak vasina.
Jornalista : Celestina Teles
Editór : Francisco Simões
