DILI, 02 setembru 2021 (TATOLI) – Prezidente Institutu Nasional Formasaun Dosente no Profisionál Edukasaun (INFORDEPE, sigla portugés), Manuel Gomez de Araújo, hateten formandu timoroan 106 atu sai formadór frekuente hela formasaun PRO-Portugés iha munisípiu sira no agora tama ona bá formasaun modula II.
Prezidente INFORDEPE Mauel Gomez, hateten formasaun Pro-Portugés ba formandu timoroan 106 ho intensaun atu prepara timoroan sira ne’e hodi sai fali formadór atu habelar fali formasaun ba formandu timoroan sira seluk iha futuru.
“Mezmu konfinamentu obrigatóriu, maibé formasaun kontinua lao tanba media ita aplika ne’e kumpre hela protokolu Organizasaun Mundiál Saúde (OMS) ho Ministériu Saúde nian,” Manuel Gomez ba Agência Tatoli iha edifísiu INFORDEPE, Dili, kinta ne’e.
Nia afirma katak formasaun PRO-Portugés ba formandu timoroan 106 ne’e kada munisípiu fahe entre ema na’in-10 to’o na’in-12, nune’e labele prejudika ema barak iha formasaun nia laran.
Manuel simu mandatu nu’udar Prezidente INFORDEPE iha fevereiru liubá, ho objetivu atu kontinua planu no asaun ne’ebé trasa ona iha tinan hirak liubá.
Atividade sira konsege realiza iha fulan lima nia-laran mak hanesan halo ona abertura formasaun bá formadór timoroan 106 iha programa PRO-Portugés hahú iha fulan marsu liubá.
INFORDEPE konsege realiza lansamentu estájiu pedagójiku ba profesores estudante baxarelatu hamutuk 2.595. Programa ne’e lansa iha 22 jullu liubá no daudaun ne’e sira hala’o hela estájiu iha eskola sentrál sira iha munisípiu 12 inklui RAEOA.
Koordenadór Projetu PRO-Português, Armindo de Jesus Barros, informa katak formasaun PRO-Portugés tuir kurríkulu tenke kompleta oras 360 kada loron tenke kompleta oras neen (6), ne’e-duni alvu hosi finalidade formasaun ne’e hahú iha 16 agostu 2021, tenke finaliza iha 15 novembru 2021.
“Se laiha konfinamentu obrigatóriu, ami nia alvu hahú iha loron 16 agostu tenke konklui iha loron 15 novembru 2021,” nia informa.
Jornalista : Tomé Amado
Editór : Francisco Simões
