COVALIMA, 03 setembru 2021 (TATOLI) – Administradór Munisípiu Covalima, Francisco de Andrade, informa Munisípiu Covalima sei la selebra aniversáriu Masakre Setembru Negro 1999 tanba evolusaun númeru COVID-19.
“Ami la iha planu no preparasaun atu selebra masakre setembru negro, iha loron 6 setembru mai ne’e, tanba situasaun iha Covalima númeru COVID-19 aumenta nune’e atividade hotu ita sei la hala’o,” Administradór Covalima, Francisco de Andrade informa ba Agência Tatoli iha salaun Administrasaun Covalima, sesta ne’e.
Francisco hateten, maske Governu la iha atividade hodi selebra masakre setembru begro 1999, maibé depende ba família ne’ebé hakarak husu misa ka selebra misa requiem hodi ba kari ai-funan.
Masakre setembru negro memória istória pasada ne’ebé kruél tebes ne’e sei grava-metin iha vítima no sobrevivente nia neon. Susar atu haluha.
Memória kruél ne’e sei metin iha vítima ida-idak nia neon ba ne’ebé sira la’o no iha ne’ebé sira hamriik ba. Hanesan fitar ida karik, memória ida-ne’e nunka atu lakon no mohu hosi jerasaun ida ba jerasaun.
Jornalista : Celestina Teles
Editór : Francisco Simões
