BAUCAU, 03 setembru 2021 (TATOLI)–Pesoál Saúde na’in-27, kompostu hosi mane na’in sia no feto 18 iha Ospitál Referál Eduardo Ximenes (HorEX, sigla portugés) Baucau infetadu COVID-19, tanba ne’e afeta tebes ba atendimentu iha ospitál.
“Hahú loron 18 agostu to’o ohin loron, pesóal saúde na’in 27 maka pozitivu COVID-19, maski númeru rekursu umanu limitadu, maibé pesoál saúde ho kondisaun di’ak kontinua halo atendimentu ba pasiente sira,” Diretora Ezekutiva no Prezidente Konsellu Administrasaun HorEX, Elizabeth Leto Mau, informa ba Agência TATOLI, iha ninia knaar fatin, Vila Nova, Baucau, sesta ne’e.
Pesoál saúde ne’ebéinfetadu COVID-19 iha departamentu emerjénsia, maternidade, admistrasaun, biomédika, laboratóriu no seluk tan.
“Na’in-haat iha ona auto-izolamentu iha uma no restu iha izolamentu obrigatóriu iha Casa Corres no sira-nia kondisaun di’ak hotu, tanba maioria simu ona vasina COVID-19. Iha munisípiu Baucau agora transmisaun komunitária ne’ebé posibilidade infetadu hosi pasiente inklui komunidade iha li’ur ba funsionáriu internál HorEX nian,” nia dehan.
Nune’e, Ospitál Referál Baucau aplika ona regra ba pasiente ne’ebé atu halo tratamentu saúde, obrigatóriu tenke submete ba teste swab atu prevene kontájia COVID-19 ba ema seluk.
Funsionáriu Ospitál Referál Baucau hamutuk 417, kompostu hosi pesoál profesiónal saúde, seguransa, administrasaun no pesoál cleaner.
Jornalista : Natalino Belo
Editora : Julia Chatarina
