COVALIMA, 6 setembru 2021 (TATOLI) – Abitante Munisípiu Covalima 62,9% simu ona vasina. Hosi númeru ne’e, abitante vasina dose dahuluk na’in-26,206 no dose daruak ni’an-6,687.
“Ita iha Covalima abitante simu vasina atinje ona 62,9 % nune’e ita kontinua vasina abitante sira ne’ebé hakarak vasina,” diretór Servisu Saúde Munisípiu Covalima, Filipe Pereira Lemos, informa ba Agência Tatoli iha nia kna’ar fatin, Covalima, segunda ne’e.
Iha semana ne’e pesoál saúde vasina abitante númeru ki’ik, tanba ne’e servisu saúde Munisípiu Covalima orienta ona ba xefi sentru saúde no postu saúde orienta ba pesoál saúde kontinua vasina, nune’e abitante Covalima simu vasina bele atinje 80%
Filipe Pereira Lemos esplika, stoke vasina AstraZeneca iha Covalima sei sufisiente, iha semana kotuk simu tan vasina 5,500 vial, maioria abitante hosi Covalima simu vasina AstraZeneca tanba Ministériu Saúde haruka vasina Sinovak ho limitadu ba de’it ema na’in-500.
Jornalista : Celestina Teles
Editór : Francisco Simões
