DILI, 06 setembru 2021 (TATOLI)-Prezidente Interinu Autoridade Munisípiu Dili, António Moniz Calau hateten, númeru kazu COVID-19 liuliu variante Delta iha kapitál Dili kontinua aumenta tanba komunidade nia konsiénsia hodi kontribui ba protokolu saúde nian ba COVID-19 sei ne’e menus.
Notísia Relevante : Administradór postu lima iha Dili simu tomada pose
“Ita-nia komunidade Dili fiar liubá informasaun falsa ka hoax ka propaganda oioin ba COVID-19 duké fiar ba Governu, no populasaun barak mak seidauk simu vasina entaun agora akontese ho númeru kazu ema mate iha Dili kauza variante Delta loroloron aumenta to’o númeru ema mate sa’e ona ba 50,” António Moniz Calau informa ba Agência Tatoli iha salaun STAE, Caicoli, Dili segunda ne’e.
Atu evita númeru COVID-19 iha kapitál ne’e konsiénsia hahú hosi komunidade. Maibé polítika ne’ebé Munisípiu Dili daudaun halo hodi esforsu makaas mak kontinua halo sosializasaun COVID-19 nian no vasina nian ba komunidade oinsá komunidade labele fiar ba hoax hodi partisipa vasina.
“Horibainrua (04/09/2021) ita hamutuk ho parte saúde munisípiu nian lansa ona programa ida naran konsulta aldeia objetivu oinsá ita hakbesik aan liután ba komunidade hodi sosializa informasaun vasina nian ba komunidade hodi partisipa vasina,” nia hateten.
Munisípiu Dili kompostu hosi Postu Administrativu neen hanesan, Dom Aleixo, Nain Feto, Vera Crus, Kristu Rei, Ataúro no Matinaro.
Jornalista : Arminda Fonseca
Editór : Francisco Simões
