DILI, 06 setembru 2021 (TATOLI)-–VIII Governu Konstitusionál prevee orsamentu iha tinan fiskál 2022 atu konstrui edifísiu Universitáriu Defeza Nasionál iha suku Liurai, munisípiu Aileu ho rai nia ektare 47.
“Governu aprova ona atu submete faze inisiál konstrusaun ba instalasaun edifísiu Institutu Defaza Nasionál ne’ebé maka sei transfroma ba Universitáriu Defeza Nasionál. Ho orsamentu alokadu ba tinan oin hamutuk millaun $30,” Diretór Institutu Defeza Nasionál (IDN), Komodoro Donaciano Costa Gomes Pedro ‘Klamar Fuik’, hateten, iha edifísiu Ministériu Finansa (MF), Aitarak-laran, sesta ne’e.
Dezeñu detalladu ba projetu instalasaun iniversidade ne’e aprovadu ona iha tinan 2018, maibé tanba razaun tékniku no sirkuntasiál hanesan COVID-19 maka la konsege implementa to’o tama tinan 2021.
“Ita-nia orsamentu alokasaun dahuluk ba projetu ne’e hamutuk $1, maibé iha korte ne’ebé hela $300.000 hodi utiliza ba re-ajustamentu estudu viabilidade ne’ebé inisiálmente halo iha área Kaitehu, Liquiçá, maibé transfere fali ba munisípiu Aileu,” nia informa.
Iha diskusaun Komisaun Revizaun Orsamentu Polítika (KROP), IDN la husu adisionál tanba prevee ona orsamentu millaun $30, maibé hafoin ezekuta obra ne’e iha diferensa $658.000, ne’ebé sei presiza hatama tan liuhosi ajustamentu.
Governu hakarak halo instalasaun ba universidade ne’e atu forma sidadaun hotu liuhosi formasaun adekuada kona-ba sidadania, patrotizmu, nasionalizmu, dever no direitu ba partisipasaun dezenvolvimentu nasionál.
Aleinde ne’e, Governu hakarak forma líder sira atu sustenta independénsia ne’ebé mak konkista liuhosi timor-oan ne’ebé mate kuaze 250.000 iha tempu okupasaun.
“Ita presiza líder di’ak no lider ne’ebé iha formasaun adekuada iha kuadru aliñamentu, konseptuál no doutrinária, ho prisípiu atu hanoin katak sai líder tenke orienta ema barak nia hakarak no ema barak nia di’ak,” nia afirma.
Jornalista : Florêncio Miranda Ximenes
Editora : Julia Chatarina
