DILI, 06 setembru 2021 (TATOLI)–Ministériu Koordenadór Asuntu Ekonómiku (MKAE), Joaquim Amaral, hateten, Ministériu Finansa (MF) aprova ona dokumentu administrativa hodi fó biban ba Ministériu Turizmu, Komérsiu no Indústria (MTKI) atu halo distribuisaun Cesta Bázika ba reklamante sira.
“Iha planu katak fulan setembru ne’e sei distribui Cesta Bázika ba reklamante sira tanba Ministériu Finansa halo ona aprovasaun dokumentu administrativu sira no ekipa ministériu implementadór mós prontu ona atu ezekuta iha terrenu,” Ministru Joaquim hateten iha edifísiu Ministériu Finansa, Aitarak-laran, segunda ne’e.
Notísia relevante: Governu esforsu atu atribui Cesta Bázika ba reklamante sira
Baze ba lista hosi Ministériu Administrasaun Estatál (MAE), hatudu reklamante hamutuk 25.569 hosi uma-kain 5.651, ne’ebé kompostu hosi Dili hamutuk 19.000 no restu hosi munisípiu Ermera.
Governante ne’e informa orsamentu ba reklamante sira prevee ona no ministériu implementadór mak resposável halo distribuisaun ba reklamante sira.
“MTKI prontu ona atu halo atribuisaun tanba númeru reklamante boot mak Dili no Ermera, tanba Ermera mós serka sanitária no konfinamentu. Nune’e, koordena hela ho MTKI atu haree posibilidade bele halo distribuisaun,” nia akresenta.
Nune’e, progresu distribuisaun Cesta Bázika hosi entidade implementadór ba benefisiáriu sira atinje ona 96,5%, ba populasaun 1.503.563 hosi suku 452, maibé suku rua no aldeia tolu mak sei pendente hela tanba komunidade iha diferensa ideia kona-ba sasán Cesta Bázika.
Entidade implementadór sira hanesan MTKI ninia área distribuisaun iha suku hamutuk 118 ho benefisiáriu hamutuk 658.608, Ministeriu Agrikultura no Peska (MAP) kobre iha suku 47 ho nia benefisiáriu hamutuk 106.782.
Sekretaria Estadu Kooperativa (SEKoop) kobre iha suku 183 ho benefisiáriu 438.055, Sentru Lojístika Nasionál (CLN, sigla portugés) kobre iha suku 86 ho benefisiáru hamutuk 215.875, no Rejiaun Administrativa Espesiál Oé-cusse Ambeno (RAEOA) kobre iha suku 18 ho benefisiáriu hamutuk 84.243.
Jornalista : Antónia Gusmão
Editora : Julia Chatarina
