DILI, 07 setembru 2021 (TATOLI)—Ministériu Transporte no Komunikasaun (MTK) propoin adisionál millaun $2 resin ba tinan 2022, iha Diresaun Nasionál Transporte Terrestre (DNTT) hodi asegura atendimentu públiku
“Iha Orsamentu Jerál Estadu (OJE) 2022 ami husu adisionál millaun $2 resin ba atendimentu públiku. Proposta ne’e liga ba atendimentu públiku, liuliu nesesidade iha DNTT, oinsá bele prodúz karta kondusaun no xapa matríkula, tanba tinan kotuk atendimentu ba kliente sira maski kumpre ona dever hotu, hanesan selu, maibé diresaun fó karta kondusaun hanesan surat tahan la’ós orijinál, ne’e problema tanba orsamentu la sufiente,” Ministru Transporte no Komunikasaun, José Agostinho da Silva, hateten ba Agência TATOLI, iha resintu Ministériu Finansa (MF), tersa ne’e.
Nune’e, governante ne’e iha esperansa ba Komite Revizaun Polítiku Orsamentu (KROP) bele aseita proposta adisionál.
Enkuantu, pakote fiskál ba tinan fiskál 2022 ne’ebé MTK hetan hosi MF hamutuk millaun $8.
“Orsamentu ami-nia kada tinan sempre hamenus, ba OJE 2020 millaun $13, tinan 2021 millaun $11, ida-ne’e sei difikulta ami-nia programa sira, liuliu atendimentu públiku,” Ministru akresenta.
Jornalista : Antónia Gusmão
Editora : Julia Chatarina
