DILI, 07 setembru 2021 (TATOLI)—Sekretáriu Estadu Formasaun Profisionál no Empregu (SEFOPE), Alarico do Rosário, hamutuk ho ekipa halo enkontru ho Konsellu Administrasaun Fundu Infraestrutura (KAFI) hodi atualiza progresu ba konstrusaun Sentru Formasaun Exelente iha Hera.
“Sira bolu mai hodi husu prosesu obra ne’e rasik to’o iha ne’ebé no husu kona-ba alokasaun orsamentu ba estudu viabilidade, dezeñu detalladu no indemnizasaun ba abitante sira ne’ebé okupa rai área konstrusaun,” Sekretáriu Estadu hateten ba Agência TATOLI, iha edifísiu Ministériu Finansa, Aitarak-laran, kuarta ne’e.
Notísia relevante: Sentru Formasaun Exelente iha faze tama estudu viabilidade
Preparasaun ba konstrusaun ne’e inisia ona desde tinan 2019 to’o agora, tanba ne’e daudaun SEFOPE submete ona dokumentu ba Komisaun Nasionál Aprovizionamentu (CNA, sigla portugés) hodi loke konkursu.
“Daudaun iha ona prosesu konkursu estudu viabilidade, ne’ebé iha hela CNA no hein rezutadu bainhira maka tun maka ita foin kontinua,” nia akresenta.
Orsamentu ba preparasaun to’o faze kontrusaun Sentru Formasaun Exelente hamutuk millaun $15, ne’ebé sei harii iha rai ho medida ektare 21 no iha futuru sei akumula ema to’o 5.000.
Komunidade afetadu hosi projetu ne’e hamutuk 74, tanba ne’e Governu prepara fó indemnizasaun ho opsaun rua mak hanesan, fó de’it osan no opsaun seluk maka halo bairru foun depende ba kondisaun.
Tuir planu sentru ne’e sei kompleta ho fasilidade no asesibilidade ba maluk portadór no difisiénsia sira.
Jornalista : Natalino Costa
Editora : Julia Chatarina
