CCC fó treinamentu kona-ba komunikasaun advokasia feto rurál
COVALIM, 8 setembru 2021 (TATOLI) – Centro Comunidade Covalima (CCC), fó treinamentu kona-ba advokasia área komunikasaun ba feto rurál hodi prepara ba eleisaun.
“CCC fó treinamentu ne’e, atu haforsa no hasa’e membru delegada sira-nia koñesimentu kona-bá komunikasaun advokasia nian hodi prepara ba eleisaun suku tuir mai,” koordenadora Programa Dezenvolvimentu ba Feto Rurál, Hilária Amaral do Carmo ba jornalista, iha Covalima, kuarta ne’e.
Durante loron tolu ne’e sei fahe matéria ne’ebé ligasaun ho oinsá atu prepara feto sira ba futuru eleisaun suku tuir mai no atu identifika problema feto Covalima hasoru liu-liu feto delegada sira, nune’e ajuda sentru hodi kontinua halo advokasia.
Feto sira ne’ebé mak tuir formasaun ne’e hamutuk na’in-16, mai hosi Suku Belecasak no Beiseu. Tuir alvu hosi CCC suku 56 maibé grupu primeiru hahú ona no grupu rua sei kontinua iha fulan ida ne’e nia laran.
Jornalista : Celestina Teles
Editór : Francisco Simões
