DTT Covalima laiha edifísiu atende públiku trata dokumentu
COVALIMA, 08 setembru 2021 (TATOLI) – Diresaun Transporte Terrestre (DTT) Covalima laiha edifísiu própriu atu atende públiku rata dokumentu transporte motorizada no karreta.
“Ami la iha edifísiu, ami uza sala ida hosi Servisu Munisípiu Obras Públika hodi atende ba sidadaun trata dokumentu transporte, hanesan motorizada no karreta,” diretór DTT Covalima, Juaquim Gusmão, informa ba Agência Tatoli iha nia kna’ar fatin, Santa Rosa, Covalima, kuarta ne’e .
Maske DTT Covalima laiha edifísiu própriu, maibé iha fulan agostu, tinan ne’e, DTT kontribui ona reseita $3.900 ba kofre Estadu.
“Reseita ne’e mai hosi ami nia atendimentu durante iha fulan agostu, hanesan halo inspesaun veíkulu, renova karta kondusaun, renova lisensa trajetu no troka proprietária,” Juaquim hateten.
Tuir estimasaun hosi DTT Covalima katak kada tinan kontribui reseita $45,000 liu, maibé tinan ne’e seidauk hatene tanba estadu Timor-Leste implementa estadu emerjénsia no serka sanitária iha situasaun pandemia COVID-19.
Maske Covalima implementa serka sanitária, maibé DTT Covalima kada loron atende sidadaun 15 trata dokumentu motorizada no mós veíkulu. Tanba bainhira DTT la atende sei difikuldade ba sidadaun sira hodi halo movimentu iha territóriu Timor.
Funsionáriu ne’ebé servisu iha DTT Covalima hamutuk na’in-hitu (7), hosi númeru ne’e inklui ona ho diretór DTT Covalima.
Jornalista : Celestina Teles
Editór : Francisco Simões
