COVALIMA, 09 setembru 2021 (TATOLI) – Ministériu Obras Publika (MOP) fó treinamentu kona-bá lala’ok prienxe dokumentu konkursu públiku ba kompañia lokál iha Covalima.
“Ami hala’o treinamentu ida-ne’e, oinsá atu hanorin kompañia lokál hodi prienxe dokumentu ho didi’ak hodi fasilita ekipa avaliasaun no kompañia sira bele sai vensedór iha prosesu tenderizasaun,” Xefe Departamentu Jestaun Kontratu, Dionísio Guterres, informa ba Ajénsia Tatoli iha edifísiu SMOP Covalima, Santa Rosa, kinta ne’e.
Treinamentu ne’e hala’o durante loron ida ne’ebé MOP servisu Hamutuk ILO R4D ho programa fó treinamentu hodi kapasita kompañia lokál atu hala’o ho ida idak nia área
Diretór servisu Munisipál obra publika, Alberto Cardoso hateten, atividade Pre-BiD Training ba kompañia sira hosi bele hatene lala’ok prienxe dokumentu konkursu públiku.
Diretór Alberto husu ba kompañia sira atu aproveita oportunidade ho didi’ak nune’e bele kompriende lala’ok prienxe dokumentu.
“Ami hala’o treinamentu ba kompañia sira bazeia ba esperiénsia tanba sira ladún iha koñesimentu prienxe dokumentu konkursu públiku nune’e kada tinan kompañia la bele sai vensedór,” Alberto hateten.
Ho esperiénsia ne’ebé iha Ministériu iha hanoin hodi kapasita kompañia sira bele iha koñesimentu di’ak hodi prienxe BoQ sira ho lolos. MOP sei lori kompañia sira ba vizita atu halo manutensaun ba estrada iha Postu Administrativu Tilomar ho Zumalai.
Jornalista : Celestina Teles
Editór : Francisco Simões
