DILI, 11 setembru 2021 (TATOLI)—Reprezentante Konsellu Veteranu, Gorge Martins, husu ba kombatente sira atu uza osan rihun $40 ne’ebé Governu fó ho responsabilidade hodi halo uma.
Governu liuhosi Sekertáriu Estadu Asuntu Antigu Komabatente Libertasaun Nasionál, Gil da Costa Monteiro ‘Oan Soru’ inaugura tan uma foun ba Veteranu Filipe Belo Gama ‘Rai-lakan’, ne’ebé hanesan kombatente ne’ebé luta ba libertasaun nasionál durante tinan 24 iha ai-laran.
“Ida-ne’e sai ezemplu ba ema hotu. Labele uza fali ba buat seluk, entaun lakon esperansa. Tanba oportunidade ne’ebé Governu fó mai ita dala-ida de’it,” Reprezentante Konsellu Veteranu, hateten, durante seremónia inaugurasaun uma, iha suku Wenunuk, postu administrativu Metinaro, munisípiu Dili, sábadu ne’e.
Reprezentante Kombatente Rejiaun IV ne’e, agradese no urgullu ba Governu ne’ebé tau atensaun ba veteranu sira hodi oferese osan hodi konstrui uma.
“Sakrifísiu no kontribuisaun ne’ebé Rai-lakan halo ne’e ho valór boot,” nia akresenta.
Nia nota katak, subsídiu harii uma hosi Governu ba benefisiáriu kuaze 100, barak liu ba Veteranu hosi Baucau, Lautém no Viqueque, hosi Ainaro tolu, Manufahi rua no sira ne’ebé konsege finaliza mak na’in-rua hosi Metinaro, Afonso Malibuti no Rai-Lakan, enkuantu seluk hosi Manufahi Same mak Veteranu Mau Tino.
Notísia relevante: Governu inaugura ona uma veteranu saudozu ‘Mau Tino’ iha Same
“Konstrusaun ne’ebé mak finaliza ona mak foin mak na’in-tolu no seluk ne’e sei kontinua prosesu konstrusaun hela,” nia akresenta.
Joven Metinaro ajuda konstrusaun uma Veteranu Rai-lakan
Nune’e mós, Administradór postu Metinaro, Fausto Soares Dias, konsidera veteranu sira-nia luta ba libertasaun labele selu no matéria, tanba ne’e enkoraja joven sira ne’ebé ajuda konstrusaun hodi nafatin kontinua obra kombatente sira hodi kontribui ba dezenvolvimentu nasionál.
“Sira-nia luta ba rai ne’e lori osan hodi selu nunka bele, maibé ita-nia partisipasaun di’ak ho respeitu ba sira-nia luta libertasaun ba rai ida-ne’e bele kontribui. Tanba ne’e, ita-nia serbisu ne’ebé fó ona Aman Veteranu Rai-lakan, ho asaun ne’e, Autoridade postu Metinaro husu ba joven hotu iha Metinaro atu kria solidariedade iha sosiedade,” nia subliña.
Nune’e mós, Koordenadór Persaudaraan Setia Hati Terate (PSHT) Matinaro, Alfredo Soares Fernandes, hateten, joven sira apoiu konstrusaun uma Veteranu Rai-lakan, kada semana iha loron sábadu no domingu hafoin partisipa misa.
“Ami prontu ho ami-nia liman-ain de’it, maibé fora hosi ne’e ami labele. Ida-ne’e ami-nia kbiit no ami halo. Ami halo asaun ne’e tanba ami joven nia objetivu mak atu halibur hodi hatene kona-ba nasionalizmu no patriotizmu ba rai ida-ne’e,” koordenadór hateten.
“Maibé ami la’ós ajuda de’it fatin ne’e, ami mós ajuda halo igreja iha Maubara inklui halo uma ba ema kbiit laek sira iha Metinaro, inklui vítima dezastre naturál ne’ebé mak akontese iha postu Laga nian,” nia haktuir.
Biban hanesan, Veteranu Rai-lakan (uma-na’in), agradese ba joven sira iha postu Metinaro tanba bele ajuda nia.
“Ha’u agradese ba kolega sira-ne’ebé mak ajuda ha’u hodi halo ha’u-nia uma, bainhira ita selu de’it badaen ne’e osan la to’o, maibé ajuda hosi joven na’in-120 ne’e mak to’o ohin loron bele finaliza. Ajuda halo uma ne’e ho gratuita maibé kona-ba materiál ne’e ha’u-nia mesak de’it,”nia agradese.
Veteranu ne’e halo uma ho medida medida metru kuadradu 15X9, ho kuartu neen no varanda rua.
Governu apoia osan rihun $40 ba kada veteranu ne’ebé dedika-an durante tinan 20 to’o 24 ba luta independénsia nasionál, hodi konstrui uma, ne’ebé transfere ba idaidak ninia konta bankária.
Objetivu kontrusaun uma ba veteranu atu dignifika sira-nia dedikasaun, ne’ebé bainhira funu hotu iha tinan 1999, fila mai vila-laran laiha fatin hodi hela, tanba ne’e Governu liuhosi Ministériu Asuntu Kombatente Libertasaun Nasionál (MAKLN) halo programa hodi konstrui uma.
Antes ne’e, prevee orsamentu ba konstrusaun uma veteranu hamutuk 60 ne’ebé korresponde ho totál orsamentu millaun $2,4 maibé ikus mai aumenta ba uma hamutuk 96.
Jornalista : Osória Marques
Editora : Julia Chatarina
