Kompañia hahú konstrui jardín 59 Viqueque

VIQUEQUE, 13 setembru 2021 (TATOLI)—Kompañia lokál Seceful Unip,Lda, hahú hala’o konstrusaun ba jardín 59 iha postu administrativu Viqueque Villa, munisípiu Viqueque, segunda ne’e.

“Ami hahú halo konstrusaun ba jardín no garante katak to’o fulan novembru sei atinje 40%. Tanba ne’e, agora ami esforsu hela atu serbisu ho másimu,” Jestór kompañia Seceful Unip,Lda, Pascoál Vitál, hateten ba jornalista-sira, iha fatin konstrusaun jardín 59, segunda ne’e.

Notísia relevante:Bolly husu kompañia garante kualidade konstrusaun jardín 59

Tuir planu jardím ne’e sei  entrega ba Governu iha fulan ikus tinan 2021, tuir dezeñu ne’ebé parte Planu Integradu Dezenvolvimentu Munisípiu (PIDM).

Nune’e mós Diretór PIDM, Domingos Monteiro de Carvalho, hateten iha munisípiu Viqueque projetu rua maka PIDM haree, ida mak moru administrasaun munisípiu no jardín ne’e rasik.

“Loloos ne’e projetu rua ne’e, ohin hahú konstrusaun dala ida, tanba projetu ho pakote ida de’it. Maibé, moru maka seidauk halo konstrusaun,” nia informa.

Orasamentu ba jardín ho plafon validasaun hosi Ajénsia Nasionál Dezenvolvimentu (ADN), hamutuk $273. 301,49 no moru $233. 346,66

Joranalista: Vitorino Lopes da Costa

Editór: Cipriano Colo