VIQUEQUE, 13 Setembru 2021 (TATOLI)–Ministériu Agrikultura no Peska (MAP) liuhosi Diresaun Floresta no Agro-Komérseiu sei instala sentru integradu agro-komérsiu indústria, Raitahu, suku Uma Uain Kraic, postu Viqueque Villa, munisípiu Viqueque.
“Programa reflorestasaun no indústria sei okupa área Raitahu kuaze ektare 100, atu implementa sentru integradu agro-komérsiu. Ita hetan ona aseitasaun hosi suku Uma-Uain Kraik ba realizasaun atividade iha fulan novembru,” Diretór serbisu Ministériu Agrikultura no Peska (MAP), Munisípiu Viqueque, Carlos Pinto, hateten ba jornalista, segunda ne’e.
Notísia relevante:Rekoperasaun ekonómika, MAP avalia serbisu ONG iha Viqueque
Tuir planu, MAP sei destaka antigu alunu hosi Arava International Center for Agriculture Training (AICAT) Izraél, hamutuk na’in-25 inklui joven hosi suku Uma Uain Kraik, hodi haree mapamentu no atividade frolesta no agro-komérsiu.
Alunu AICAT periúdu tinan 2015, Timor-Leste no Izrael halo kooperasaun iha formasaun rekursu umanu, kona-bá área agrikultura, hodi dezenvolve setór agrikultura mak sei sai tékniku hodi kontrola atividade.
Orsamentu ne’ebé sei investe iha programa ne’e ho totál rihun $650, no iha ona atribuisaun sertifikadu hosi Terras no Propriade ba MAP.
Sentru integradu ne’e, sei realiza atividade hanesan re-florestasaun, indústria ki’ik, pekuária, peska, hortikultura no plantasaun.
Jornalista: Vitorino Lopes da Costa
Editór: Cipriano Colo
