DILI, 13 setembru 2021 (TATOLI)—Tuir dadus hosi Serbisu Saúde Munisípiu Aileu, hatudu katak, to’o oras-ne’e populasaun 8.614 simu ona vasina kontra COVID-19 doze dahuluk no doze daruak hamutuk 4.516, hosi populasaun tarjetu 31.245.
Atinjimentu ne’e liu hosi atendimentu ne’ebé hahú iha 11 abríl to’o 13 setembru, husi idade 18 to’o 60 ba leten.
Notísia relevante:Tasa partisipasaun vasina iha Viqueque aas liu munisípiu seluk
“Esforsu sira-ne’e koletiva hamutuk ho autoridadee munisípiu, autoridade lokál, komandu PNTL hodi ba to’o iha postu imunizasaun-sira ne’ebé iha,” Diretór Serbisu Saúde munisípiu Aileu, Júlio dos Santos, hateten ba jornalista iha suku Hautoho, postu administrativu Remexio, segunda ne’e.
Iha fatin hanesan, Xefe Suku Hautoho, João da Silva, hateten iha suku hautoho ne’e iha aldeia tolu, no maioria komuniddae simu ona vasina, balun simu iha Dili no balun iha suku ne’e.
Nune’e mós Administradór Postu Adminsitrativu Remexio, Gastão Mendonça, promete katak, sei esforsu atu hamutuk ho ekipa liña frente konvense populasaun hodi hasa’e taxa partisipasaun vasina iha munisípiu ne’e.
“Munisípiu Aileu nia númeru vasina tun liu munisípiu sira seluk, entaun hanesan autoridade iha postu ida-ne’e sei koopera ho parte saúde atu buka hatene frakeza ne’e iha ne’ebé no tanba saida mak númeru vasina ne’e menus,” nia promete.
Kona-bá númeru ne’e, Ministru Asuntu Parlamentár no Komunikasaun Sosiál (MAPKOMS) Francisco Jeronimo, husu ba komunidade iha suku Hautoho, inklui apela populasaun Aileu tomak atu hakbesik aan ba postu vasinasaun no labele rona informasaun falsu, tanba vasina ne’e bele kontra moras hotu-hotu.
“Komunidade iha baze ne’e inosente no dala barak gosta rona informasaun ne’ebé mak falsu, katak vasina oho ema. Maibé, realidade vasina ne’e di’ak hodi kontra moras COVID-19,” Francisco Jeronimo, hateten iha kampaña vasinasaun iha suku Hautoho, Postu Administrativu Remexio.
Jornalista: Felicidade Ximenes
Editór: Cipriano Colo
