SEII fó treinamentu kona-bá jestaun orsamentu ba benefisiáriu grupu feto
COVALIMA, 13 setembru 2021 (TATOLI) – Sekretáriu Estadu Igualdade no Inkluzaun (SEII) fó treinamentu kona-bá jestaun orsamentu ba benefisiáriu grupu feto.
“Ami fó formasaun no ami apoiu fundus haree liu ba jestaun negósiu no kontabilidade,” pontu vokál SEII Covalima, Francisco de Araújo informa ba Agência Tatoli iha Salaun Administrasaun Covalima, segunda ne’e.
SEII fó treinamentu ba grupu benefisiáriu feto sira hahú iha tinan 2018 to’o ohin loron iha Covalima no apoiu fundus grupu 20 ne’ebé hala’o atividade negósiu hanesan loke kioske, hakiak-manu, kuda-modo no seluk tan.
Hafoin SEII fó apoiu grupu sira-ne’e hetan ona susesu hodi bele fó sira nia oan ba eskola no mós hodi bele sustenta nesesidade uma laran nian kada loron.
Administradór Munisípiu Covalima, Francisco Andrade, husu ba grupu benefisiáriu feto sira tenke tuir formasaun ho seriedade.
“Ita Timor gosta uza de’it osan lakohi servisu bainhira grupu ne’ebé la susesu ba oin labele fó apoiu tan ita fó fali ema seluk,” Francisco Andrade hateten.
Administradór agradese ba SEII nia programa hodi apoiu fundu ba feto sira rurál tanba ne’e tenke uza osan ho kuidadu nune’e bele halo mudansa ba moris.
SEII fó fundu ne’ebé natoon, maibé ho apoiu ne’e bele buka moris atu labele dependénsia ba Estadu, maibé ida idak tenke iha kompromisu oinsá bele moris.
“Ha’u lakohi haree bainhira grupu sira hetan ona apoiu tenke jere osan ho didi’ak, labele envolve iha joga karta maibé buka moris,” Francisco Andrade hateten.
Jornalista : Celestina Teles
Editór : Francisco Simões
