COVALIMA, 14 setembru 2021 (TATOLI) – Civil Society Education Partnership (CSEP) hamutuk ho Forum Juventude Marjinalizadu (FJM), tersa ne’e, iha salaun administrasaun Covalima, realiza semináriu avaliasaun progresu no dezafiu setór edukasaun durante pandemia COVID-19.
“Ita hakarak rona perspetiva hosi estudante no joven sira nia haree prosesu aprendizajen durante pandemia COVID-19 hodi bele rona direita espresaun hosi estudante sira,” Programa Officer CSEP, Moisés Charles, ba jornalista sira.
Durante pandemia COVID-19 setór edukasaun enfrenta dezafiu no estudante sira ladún partisipa iha aula prejensiál hodi difikuldade ba estudante sira.
Polítika Ministériu Edukasaun Juventude no Desportu implementa eskola ba uma, maibé estudante sira la iha telefone android, internet, televizaun no mós la iha eletrisidade hodi halo estudante sira sai vítima.
Administradór Munisípiu Covalima, Francisco de Andrade, husu ba estudante no juventude atu aproveita oportunidade hodi aprezenta idea.
“Semináriu ne’e ita boot sira bele aprezenta difikuldade ne’ebé ita boot sira enfrenta durante pandemia covid-19,” Francisco hateten.
Diretór Servisu Edukasaun Munisípiu Covalima, Edmundo Pereira, rekoñese dezenvolve edukasaun sofre hahú iha tinan 2020 to’o ohin loron.
Ministériu Edukasaun hamutuk ho parseiru sira hodi halo prevensaun ba COVID-19, fase-liman ho sabaun no implementa polítika eskola ba uma
“Ita agora hein hela despaixu hosi Ministériu Edukasaun Juventude no Desportu atu suspende aula prejensiál durante semana rua,” Edmundo tenik.
Jornalista : Celestina Teles
Editór : Francisco Simões
