VIQUEQUE, 14 setembru 2021 (TATOLI)—Ministériu Agrikultura no Peska (MAP), Liu hosi Diresaun Munisipál Viqueque ho Autoridade munisípiu kolleta liis ektare haat, hosi grupu Irameli, iha suku Uagia, postu administrativu Ossu.
Adiministradór Munisípiu Viqueque, Januário Soares, hateten grupu sira ho inisiativa ne’ebé di’ak, hodi halo produsaun ba liis hanesan kriasaun kampu serbisu rasik, atu bele sustenta nesesidade família no sai ezemplu ba populasaun atu hakbesik ba rai ne’ebé sei abandonadu.
Notísia relevante:MEJD sosializa programa ‘Eskola ba Uma’ iha Viqueque
“Grupu sira ho inisiativa di’ak hodi halo produsaun, ita-nia rai bokur presiza organiza-malu ho di’ak. Agradese ba grupu ne’ebé hetan tulun hosi MAP no organizasaun tomak, ne’ebé organiza grupu-sira ho di’ak tebes,” Januário Soares hateten ba jornalista-sira, iha suku Uagia, tersa ne’e.
Bolly hatutan, grupu sira kuda ho rezultadu ne’ebé di’ak no ohin kolleta, kolektór sira sosa diretamente ba grupu sira-nia produtu.
Nia husu parte MAP atu fó apoiu nafatin ba komunidade no oferse formasaun ruma, hodi hasa’e produtividade no reforsa ekonomia família.
Iha fatin hanesan, koodenadór grupu Irameli, Luciano Araújo da Silva, agradese tanba bele kolleta ona liis, nu’udár rezultadu hosi produtu tinan 2020 nian.
Grupu Irameli hamutuk ema na’in-neen, kuda liis me’an no bombai halo produsaun durante tinan tolu, hosi rezultadu ne’e uza hodi sustenta nesesidade uma laran, halo uma no selu oan sira nia eskola, maski faan de’it ho kada kilograma $1,50 sentavu.
Iha okaziaun ne’e koletór, Tito de Oliveira Guterres, haktuir, inisiativa grupu agrikultór-sira di’ak nafatin hasa’e produsaun sei hetan rendimentu di’ak ba família-sira.
Jornalista: Vitorino Lopes da Costa
Editór: Cipriano Colo
