TR oferese motorizada sia ba TDD

DILI, 14 setembru 2021 (TATOLI)—Tribunál Rekursu (TR), oferese motorizada foun hamutuk sia (9) kompostu hosi KLX  ualu no Honda Fit ida, ba Tribunál Distritál Dili (TDD).

“TR oferese motór hirak-ne’e mai TDD, hodi apoia serbisu-sira ho di’ak liu-tan,” Juis Administradór TDD, Afonso Carmona, hateten ba jornalista Agéncia Tatoli iha kna’ar fatin, Mandarin, tersa ne’e.

Notísia relevante:Konstrusaun Edifísiu TDD atinji ona 27%

Afonso Carmona  la esplika detalla kona-bá orsamentu hira mak utiliza hodi sosa motorizada hirak-ne’e, tanba parte TR  mak hatene ninia ezekusaun.

Tuir planu, motorizada ualu sei distribui ba funsionáriu ofisiál justisa departamentu esterna, hodi bele fasilita serbisu lori karta notifikasaun ba sidadaun-sira ne’ebé identifikadu atu tuir julgamentu iha Dili no munisípiu, no motór ida mak sei distrui ba departementu sentrál.

Durante ne’e, transporte ba ofisiál justisa laiha, tanba ida-idak uza motór privadu, nune’e ho fasilidade ne’e sei  apoia diak liu-tán serbisu.

TDD daudaun ne’e iha ofisiál justisa hamutuk na’in 43, balun koloka iha departementu prosesu sivíl, krime, sentrál, esterna, interna ho knaar atu halo notifikasaun, atende sidadaun iha Tribunál, fasilita juis halo julgamentu no seluk tán.

Jornalista: Nelson de Sousa

Editór: Cipriano Colo