VIQUEQUE, 14 setembru 2021 (TATOLI)—Udan boot ne’ebé akontese iha semana kotuk, estraga hare povu agrikultór iha postu administrativu Uatulari, munisípiu Viqueque, ne’ebé iha hela períudu kolleta.
Agrikultór, Olívio Guterres, hateten ba jornalista Agência Tatoli, via telefónika katak oras ne’e daudaun iha hela natar, tanba foin mak kolleta, maibé udan derrepente no estraga hare to’o balun moris fali ona.
Notísia relevante:MAP kolleta hare nakroma ektare 24 iha Uatulari
“Udan agora ne’e lori sofrimentu tanba ha’u-nia natar ko’a hotu ona, maibé udan been hoban hare balun moris ona, ita salva la di’ak,” Olívio Guterres, hateten.
Nune’e mós Xefe suku Uaitame, José do Rosário, rekoñese katak, udan boot iha semana kotuk to’o agora estraga duni hare populasaun iha suku ne’e.
Tanba ne’e, Xefe suku sei koordena ho entidade-sira oinsá salva hare atu lori sai hosi natar, tanba tuir previzaun katak, udan sei la para.
Kona-bá situasuan ne’e, Diretór Serbisu Ministériu Agrikultura no Peska (MAP) munisípiu Viqueque, Carlos Pinto, konvoka ona enkontru ho estensionista-sira hodi buka dalan atu tula sai hare populasaun ne’ebé sei iha natar laran.
“Mudansa klimátika ne’e, la’ós iha Viqueque de’it, maibé iha fatin-fatin, liuliu difikulta tebes ita-nia agrikultór-sira hosi Uatulari,” Carlos Pinto, hateten.
Nia husu autoridade lokál ho komunidade Uatulari haruka lalais karta formál mai MAP Viqueque, atu mobiliza tratór boot rua, hodi tula sai hare hosi natar ba uma komunidade.
Jornalista: Vitorino Lopes da Costa
Editór: Cipriano Colo
