VIQUEQUE, 15 setembru 2021 (TATOLI)—Diretór eskola Katólika Ensinu Báziku Sentrál (EBC sígla portugés) Nossa Senhora de Fátima, Macadique, postu Uatulari, munisípiu Viqueque, Padre Emanuel Kawuta, SVD, informa, durante ne’e eskola ne’e laiha merenda eskolár ba estudante-sira.
Diretór eskola hato’o asuntu ne’e ba jornalista, hafoin hetan vizita hosi Vise-Ministru Edukasaun Joventude no Desportu (MEJD), António Guterres, iha kuarta ne’e.
Notísia relevante:Merenda eskolár segunda trimestrál la atinje loron 42
“To’o agora ami laiha merenda eskolár ba estudante, tanba ami la hetan subsídiu. Agora ami konsulta hela ho parte Komisaun Nasionál Edukasaun Katólika (KONEKTIL) hodi hatene tanba saida mak ami la hetan,” nia hateten.
Iha oportunidade ne’e, Vise MEJD, António Guterres eplika, programa merenda eskolár ba eskola hotu inklui eskola privada sira, Governu apoiu subsídiu.
“Eskola privada, ita aloka la’ós ba direta eskola-sira, maibé Governu aloka liu hosi KONEKTIL mak halo jestaun,” nia hateten.
Objetivu hosi vizita ba eskola-sira ne’e, António Guterres hakarak haree direta kondisaun eskola-sira hanesan eskola Tékniku Vokasionál Calo Heda, Ensinu Báziku 07, Ensinu Báziku Filiál (EBF) Belia no EBC Nossa Senhora de Fátima.
Tuir dadus, estudante hosi EBC Nossa Senhora de Fátima, Macadique, hamutuk 376 no totál profesór na’in 25.
Jornalista: Vitorino Lopes da Costa
Editór: Cipriano Colo
