COVALIMA, 15 setembru 2021 (TATOLI) – Administradór Munisípiu Covalima, Francisco de Andrade, informa implementasaun programa merenda eskolár segunda trimestrál iha Covalima la atinje loron 42 tanba impaktu hosi implementa serka sanitária.
“Implementasaun programa merenda eskolár ita la’ós haree ba loron, maibé tuir loloos kada trimestrál implementa loron 42, tanba serka sanitária segunda trimestrál implementa foin loron 12,” Francisco de Andrade informa ba Agência Tatoli iha nia kna’ar fatin, kuarta ne’e.
Nia hateten, orsamentu ba merenda eskolár tinan 2021 hamutuk $600,000 bainhira la konsege ezekuta hotu tenke fila ba kofre Estadu.
Diretór Eskola Báziku Sentrál Ladi, Pedro Amáral haktuir, implementasaun programa merenda eskolár la’o normal, maibé problema implementasaun oráriu tanba implementa serka sanitária.
“Programa merenda eskolár iha EBC Ladi ami implementa ona ba segundu trimestrál ne’ebé oras ne’e daudaun la’o hela,” Pedro hateten.
Estudante iha EBC Ladi hahú hosi primeiru ano to’o nono ano hamutuk 939. Hosi númeru ne’e, feto 455 no mane 484, profesór na’in 39.
Jornalista : Celestina Teles
Editór : Francisco Simões
