DILI, 15 setembru 2021 (TATOLI)—Reuniaun Konsellu Ministru (KM) delibera atu autoriza selebrasaun akordu finansiamentu ida entre Governu liuhosi Ministériu Finansa (MF) ho Banku Dezenvolvimentu Aziátiku (ADB, sigla ingles) ba implementasaun projetu espansaun Aeroportu Internasionál Prezidente Nicolau Lobato, Comoro.
“Konsellu Ministru fó podér tomak ba Ministru Finansa, Rui Augusto Gomes, hodi asina akordu ne’e,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.
Notísia relevante: Governu kria unidade jestaun integradu ba dezenvolvimentu Aeroportu Comoro
Enkuantu, projetu ne’e prevee estensaun ba pista aterrajen, torre kontrolu foun ida inklui reabilitasaun ba instalasaun sira seluk.
Iha ámbitu projetu espansaun aeroportu, KM delibera atu autoriza dezenvolvimentu projetu faze dahuluk, loke prosedimentu aprovizionamentu tolu, inklui tipu konkursu públiku internasionál, ba adjudikasaun kontratu públiku empreza sira ba konsesaun no konstrusaun fornesimentu servisu supervizaun no jestaun projetu.
Tuir Portavós Governu, bainhira lansa projetu ne’e, Governu sei la ignora populasaun sira ne’ebé hela iha área dezenvolvimentu projetu.
“Prosesu hirak ne’e ami fiar katak la’o, barak la’o ona, tanba planu ne’e desde uluk inklui libertasaun ba fatin hirak ne’ebé komunidade okupa,” governante ne’e dehan.
Orsamentu ba konstrusaun Aeroportu Internasionál ne’e hosi impréstimu ADB hamutuk millaun $100 no Governu aloka ona millaun $300, tanba konstrusaun aeroportu ne’e sei presiza millaun $480.
Notísia relevante: Uma-kain afetadu 130 husu Governu esplika mapamentu planu rekonstrusaun Aeroportu
Tuir dadus, abitante afetadu hamutuk uma-kain kuaze 200 mak sei hetan indemnizasaun hosi Governu, hosi suku Beto Tasi, Anin Fuik no Beto Naroman, suku Comoro, postu administrativu Don Aleixo, munisípiu Dili.
Antes ne’e, Governu Japaun hatudu kompromisu atu apoia orsamentu millaun $44 hodi konstrui aeroportu ba komponente lima hanesan terminál ba passajeiru, torre kontrolu, tax way (fatin impostu), access road (asesu rodovia) no fatin para aviaun.
Jornalista : Antónia Gusmão
Editora : Julia Chatarina
