DILI, 16 setembru 2021 (TATOLI)-Prezidente Interinu Autoridade Munisípiu Dili, António Moniz Clau, husu ba komunidade ne’ebé hela iha kapitál Dili uza konsiénsia labele husik animál la’o livre iha kapitál Dili.
Notísia Relevante : OJE 2022, Munisípiu Dili husu adisionál millaun $13,5
Hanesan autoridade Dili, António Moniza Clau, rekoñese duni foin lalais imajen ne’ebé viral iha mídia sosiál liuliu Facebook ne’ebé hatudu karau tolu ne’ebé ho tali husik han duut iha jardín Ministériu Negósiu Estranjeiru no Kooperasaun (MNEK) nian ne’e hatudu imajen ne’ebé ladi’ak, maibé momentu akontese iha loron domingu (12/09) ne’ebé ekipa seguransa la tama servisu, maibé ida ne’e fanu autoridade Munisípiu Dili oinsá ba oin halo mudansa ba servisu.
“Ha’u atu hateten katak maneira hotu-hotu ita halo ona, maibé situasaun ida-ne’e sei kontinua akontese, hatudu katak ita ema mak menus konsiénsia,” António Moniz Clau hateten iha nia knaar fatin Mataduro, Dili, kinta ne’e.
Nia esplika kapitál Dili nu’udar odamatan boot ba nasaun ne’ebé atu kuidadu no halo furak ne’e presiza kontribuisaun komunidade no entidade hotu nian.
Ba komunidade, nia husu labele husik animál livre la’o ba mai iha kapitál laran no kesi mós labele besik edifísiu públiku sira.
Jornalista : Arminda Fonseca
Editór : Francisco Simões
