VIQUEQUE, 17 Setembru 2021 (TATOLI)—Governu Nova Zelándia liu hosi ninia Embaixadór iha Timor-Leste (TL), Philip Hewitt, promete sei kontinua fó apoiu ba dezenvolvimentu edukasaun, liuliu hadi’a kondisaun edifísiu pré-eskolár-sira.
“Ha’u apresia tebes ba manorin-sira eskola pré-eskolár inklui komunidade. Maski ho situasaun ne’ebé pré-eskolár sira hasoru, maibé kontinua luta hodi hadi’a edukasaun. Tanba ne’e, Governu Nova Zelándia ho parseiru-sira iha komitmentu atu apoia pré-eskolár sira iha prosesu dezenvolvimentu edukasaun iha TL,” Philip Hewitt hateten ba jornalista hafoin vizita pré-eskolár, iha Samarogo, suku Ossorua, postu administrativu Ossu, munisípiu Viqueque, kinta ne’e.
Notísia relevante:MEJD inaugura pré-eskolár Nahareka ne’ebé konstrui hosi Nova Zelándia
Nia espika katak, Governu Nova Zelándia sei tau perioridade ba pré-eskolár sira iha TL durante tinan lima, hamutuk ho komunidade inklui parseiru dezenvolvimentu UNICEF.
Governu Nova Zelándia prevee fundu hamutuk rihun $400 kada tinan, hodi aloka ba edukasaun, no diskuti hamutuk ho Ministériu Edukasaun Joventude no Desportu (MEJD) ba ninia implementasaun.
Agora daudaun implementa ona projetu pilotu, hodi harii eskola pré-eskolár iha munisípiu rua hanesan, Ermera no Viqueque, iha 2021 konstrui ona eskola pré-eskolár komunitária hamutuk haat no pré-eskolár kada munisípiu hetan eskola pré-eskolár rua.
Jornalista: Vitorino Lopes da Costa
Editór: Cipriano Colo
