DILI, 16 setembru 2021 (TATOLI)-Prezidente Interinu Autoridade Munisípiu Dili, António Moniz Clau, hateten liuhosi reuniaun no aprezenta proposta ba Komité Revizaun Orsamentu Polítiku (KROP) kona-ba tetu Orsamentu Jerál Estadu (OJE) 2022, Dili husu adisionál millaun $ 13,5.
Notísia Relevante : Munisípiu Dili distribui foos ba vítima inundasaun uma-kain 142
“Ministériu Finansa prevee tetu tinan fiskál 2022 ba Munisípiu Dili, millaun $7,2 ka $7,279,981.00 entaun ita haree alokasaun ne’e la sufisiente ba atividade ne’ebé ita planeia atu implementa iha tinan oin, entaun ita halo tan proposta adisionál hamutuk millaun $13,5 ka 13,513,254.20 atu finansia ba atividade ne’ebé ita planeia ona,” António Moniz Clau, hateten ba Agência Tatoli iha nia knaar fatin Mataduro, Dili, kinta ne’e.
Nia hatutan, orsamentu iha proposta adisionál ba 2022 ne’ebé Munisípiu Dili husu ba programa 10 mak hanesan, programa seguransa nasionál, asesu justisa, boa governasaun no jestaun institusionál, agrikultura, saúde, estrada no ponte, edukasaun no formasaun, igualdade jéneru no inkluzaun no turizmu.
“2022, ita fó prioridade liu ba Programa Mão de Obra, Postu Administrativu (PMOPA), tanba programa ida-ne’e foun no merese duni ba ita kontinua implementa iha munisípiu Dili iha tempu agora COVID-19 ne’e, tanba bele rekupera ekonomia komunidade nian, tanba ne’e orsamentu PMOPA ne’e mak pasa ita garante sei rekruta ema rihun 7 liu iha 2022 hodi halo servisu kona-ba PMOPA refere,” nia dehan.
“Ita konta adisionál ba 2022 ne’e ba saláriu vensimentu ita husu $464,984.00, bens servisu $4,043,364.70, kapitál menór tetun OJE 2022 laiha ne’ebé adisionál ita tau de’it, $ 500,000.00, kapitál dezenvolvimentu $6,673,000.00, transferénsia públika $2,831,905.50 tanba ne’e adisionál pasa hamutuk ho tetu OJE 2022 Munisípiu Dili bele hetan millaun $20,793,235.20,” António Moniz Clau hateten.
Jornalista : Arminda Fonseca
Editór : Francisco Simões
