COVALIMA, 16 setembru 2021 (TATOLI)- Iha semana oin, Banku Nasionál Komérsiu Timor-Leste (BNCTL, sigla portugés) hahú halo pagamentu ba benefisiáriu Bolsa da Mãe iha Covalima.
“Kalendáriu ne’ebé BNCTL fó sai, semana oin, hahú halo ona pagamentu ba benefisiáriu Bolsa da Mãe iha Covalima,” pontu vokál Bolsa da Mãe Covalima, Nelson de Jesus, informa ba Agênsia Tatoli iha nia kna’ar fatin Suai Loro, kinta ne’e.
Pagamentu hahú iha segunda semana oin loron 20 fulan ne’e, no sei remata iha loron 27 fulan outubru, tinan ne’e.
Dadus hosi MSSI Pagamentu ba benefisiáriu ne’e ho nia montante orsamentu la hanesan kada ema fulan ida hetan $5.00 nune’e bainhira benefisiáriu ida fulan ida sei hetan $60.00.
Koordenadór kréditu BNCTL Suai, Daniel Merelu haktuir bazeia ba oráriu, segunda, semana oin, BNCTL hahú halo ona pagamentu ba uluk iha Postu Administrativu Fatululik, Munisípiu Covalima.
Dadus hosi MSSI hatudu katak benefisiáriu Bolsa da Mãe iha Munisípiu Covalima ne’ebé benefisia ba subsídiu ne’e hamutuk 3,995, mai hosi Postu Administrativu sira hanesan Postu Administrativu Fatululik iha benefisiáriu na’in-170 ho nia orsamento $18,900.00, Fatumea ho benefisiáriu na’in-282 ho orsamentu $30,540.00, Fohorem ho benefisiáriu na’in- 206 no orsamentu $25,980.00, Maucatar na’in-611 ho orsamentu $73,440.00, Tilomar na’in-473 ho orsamentu $58,440.00, Suia Vila na’in-1152 ho orsamentu $119,280.00 no Zumalai na’in-1,101 ho orsamentu $140,100.00.
Jornalista : Celestina Teles
Editór : Francisco Simões
