COVALIMA, 17 setembru 2021 (TATOLI) – Ministru Administrasaun Estatál (MAE) delega kompeténsia ba Administradór Munisípiu Covalima, Francisco de Andrade, hodi fó posse ba kargu xefia sesaun servisu lokál finansas no servisu lokál dezenvolvimentu komunitária hodi kompleta estrutura, postu administrativu hitu iha Munisípiu Covalima.
“Servisu ne’ebé ita-boot sira simu la’ós atu sai liurai, maibé sai servidór ba povu no atan ba povu. Simu kna’ar ne’e todan tebes, maibé simu responsabilidade atu serve ba ema hotu,” Francisco de Andrade hateten liuhosi nia diskursu iha salaun Administrasaun Covalima, sesta ne’e.
Nia hateten, kargu xefia sira bainhira hala’o servisu labele haree ba kór polítiku, maibé servisu hanesan Timor-oan onestu no transparénsia no tenke haraik an hodi hatene obedese sai instrumentu estadu ne’ebé di’ak iha povu sira nia leet.
Administradór mós husu ba funsionáriu sira bainhira oras servisu labele halimar maka komputadór hodi haree YouTube, maibé tenke aproveita tempu Estadu atu aumenta kapasidade no presta servisu.
Xefe Sesaun Lokál Dezenvolvimentu, Postu Maucatar, António Mendonça Amaral promete sei halo koordenasaun ho komunidade sira hodi hala’o dezenvolvimentu iha Postu Maucatar.
Iha nia mandatu, António sei haree oan ki’ak, idózus no invalidés hanesan servidór Estadu iha Postu Maucatar tenke halo atendimentu ho responsabilidade ba komunidade.
Jornalista : Celestina Teles
Editór : Francisco Simões
