LAUTÉM, 17 setembru 2021 (TATOLI)-–Kooperativa Kréditu Union (CU, sigla portugés) Moris -foun husu ba Sekretaria Estadu Kooperativa (SEKoop) atu halo akompañamentu no vizita hodi motiva halo atividade.
“Ami-nia servisu hotu la’o di’ak, maibé presiza akompañamentu beibeik, atu nune’e bele motiva hodi hadi’a liután ami-nia kooperativa, ne’ebé daudaun ne’e ekipa hosi SEKoop mai halo audit, ami kontente tebes tanba bele identifika ami-nia fallansu hodi nune’e ami bele hadi’a,” Sekretáriu Kooperativa CU Moris-foun, Jacob Guimarães Zacarias, relata, bainhira simu vizita Sekretáriu Estadu Kooperativa, Elizário Ferreira, iha sede provizóriu, aldeia Titilari, suku Fuiloro, postu administrativu Lospalos, munisípiu Lautém, sesta ne’e.
Aleinde ne’e, kooperativa ne’e presiza sede permanente no formasaun iha área lideransa, jere membru no kontabilidade.
“Kona-ba sede permanente, daudaun ne’e identifika ona rai no finaliza ona dezeñu, maibé seidauk bele realiza tanba orsamentu seidauk sufisiente. Maibé planeia ona iha fulan-novembru tinan ne’e hahú konstrusaun,” nia hatutan.
Hatán ba preokupasaun ne’e, Sekretáriu Estadu Elizário Ferreira, kompromete sei destaka funsionáriu SEKoop hodi tau-matan ba atividade kooperativa.
“Loos duni, hosi konkluzaun ne’ebé ami foti maka akompañamentu ne’e mak menus liu. Ami-nia ema sei mai akompaña nafatin imi kada fulan, no hosi vizita ne’e mós nu’udar aktu akompañamentu ida hodi motiva ema mai beibeik no sai membru barak liután,” governante ne’e subliña.
Biban ne’e, Sekretáriu Estadu apresia ho serbisu no atividade kooperativa ne’e, tanba membru sira serbisu hamutuk di’ak tebes desde estabelese to’o agora.
Kooperativa CU Moris-foun, harii iha loron 09 juñu 2002, rejista ona membru ativu 443, ne’ebé antes ne’e atinje 500 resin, maibé balun rezigna-an, enkuantu balun mate maibé to’o agora konsege halibur ona osan hamutuk $290.000 resin.
Jornalista : Antónia Gusmão
Editora : Julia Chatarina
