BAUCAU, 17 setembru 2021 (TATOLI)—Vise-Ministru Edukasaun Juventude no Desportu (MEJD), António Guterres, hateten, iha ona planu atu aumenta terseiru siklu (7,8,9 ano) iha Eskola Ensinu Baziku Filiál (EBF) zona Golgota iha suku Bahu, postu Baucau villa, munisípiu Baucau.
“Iha área Golgota, fatin ne’ebé estratéjiku no iha númeru alunu primeiru no segundu siklu (1-6 ano) ne’ebé boot, no tinan ida-ne’e hetan projetu komunitáriu atu halo sala eskola tolu ho haris fatin, tanba ne’e ba futuru ha’u hanoin eskola ida-ne’e posibilidade aumenta tan ba terseiru siklu,” Vise-Ministru hateten iha resintu EBF Golgota, suku Bahu sesta ne’e.
Notísia relevante: Kanalizasaun bee-moos iha EBF Golgota Bahu Baucau instaladu
Maski nune’e, tuir governante ne’e, atu halo espansaun eskola konforme ba dirijente eskola inklui inan-aman estudante, ho liña koordenasaun servisu edukasaun munisipál no koordenadór eskola atu tau ba planu.
“Importante iha planu atu konstrui mós morru haleu eskola no iha tempu hanesan loke kampu bola iha areadór eskola ba estudante sira, nune’e bainhira rekreiu sira bele utiliza ba desportu,” nia akresenta.
Iha fatin hanesan, Koordenadora EBF Golgota, Ana Floriana dos S. Marques, husu Vise-Ministru atu ajuda konstrui kampu bola iha área eskola, nune’e fasilita estudante sira.
“Kuandu rekreiu, ami hotu halo vijilánsia másimu ba sira tanba laiha kampu atu sira halimar,” Ana Floriana dehan.
EBF Golgota akumula estudante hamutuk 212, ho profesor hamutuk hitu, kompostu hosi permanente tolu, kontratadu tolu no parsiál ida.
Jornalista : Natalino Belo
Editora : Julia Chatarina
