OÉ-CUSSE, 17 setembru 2021 (TATOLI)—Provedória Direitu Humanu no Justisa (PDHJ) delegasaun teritoriál RAEOA, sesta ne’e hala’o diseminasaun kona-ba ‘Partisipasaun Komunidade mak Xave hodi Proteje no Promove Direitu Uumanu no Boa-Governasaun iha Timor-Leste’ ba komunidade sira iha aldeia Noafafo, suku Cunha, sub-rejiaun Pante Makasar.
“Diseminasaun ne’e atu hasa’e komunidade nia koñesimentu liu-liu proteje no promove direitu umanu hodi prevene má-administrasaun no promove boa-Governasaun. Komunidade, profesór no estudante sira mós presiza hatene oinsá hatama keixa, lei violensia doméstika no tráfiku umanu liuhosi diseminasaun ne’e,” Diretór PDHJ RAEOA, Paulo Ribeiro, hateten ba Agência Tatoli iha Oé-Cusse.
Durante fulan-janeiru to’o agostu ne’e, atividade diseminasaun ne’e suspende tanba situasaun pandemia COVID-19, entaun iha fulan-setembru ne’e foin mak re-ativa. Daudaun ne’e, atividade ne’e hala’o ona iha iha suku Nipani no suku Cunha, sub-rejiaun Pante Makasar.
Antes ne’e, PDHJ hala’o ona sensibilizasaun iha suku 18 liu-liu kobre ba fatin izoladu sira, nune’e atividade sensibilizasaun sei kontinua hala’o nafatin ba populasaun sira-ne’ebé hela bairru no aldeia sira.
Durante ezisténsia PDHJ iha Oé-Cusse, partisipasaun komunidade nian hodi promove direitu umanu no promove boa-Governasaun ba populasaun liuhosi sasukat ida mak haree ba númeru keixa ba violasaun ne’e koñesimentu komunidade nian di’ak ona, entaun haree ba númeru keixa ne’e bele sae.
Saskuat ne’e mós haree ba koñesimentu entidade públiku ne’ebé mak durante ne’e hala’o sira-nia kna’ar iha Oé-Cusse, iha ona koñesimentu natoon mak prátikantes ba violasaun direitu umanu ne’e menus.
Nune’e, nia hateten, tuir kazu ne’ebé rejistu mós ninia númeru estatístíka kada tinan lahanesan, balun sae no balun tun ne’e, tanba iha fatór-rua mak koñesimentu komunidade no entidade públiku nia koñesimentu natoon ona.
Xefe Suku Cunha, Domingos Seco Caunan, agradese ba intensaun PDHJ nian, atu eleva no hasa’e komunidade nia koñesimentu komunidade kona-bá direitu umanu no boa-governasaun, nune’e bele proteje direitu nomós kontribui hodi estabelese Governsaun di’ak iha RAEOA.
Jornalista : Abílio Elo Nini
Editór : Cancio Ximenes
