BAUCAU, 20 setembru 2021 (TATOLI)–Koordenadór Sentru Intergradu Jestaun Krize (CIGC, sigla Portugés) Baucau, Adolfo dias Marçal, hateten, sei hato’o pareser ba nasionál hafoin ekipa konjunta remata investiga kauza óbitu na’in-54 iha postu Quelicai.
“Hafoin ita halibur dadus no analiza hotu mak bele fó konkluzaun, hafoin iha nasionál mak sei foti desizaun kona-ba situasaun iha Quelicai hanesan atu implementa konfinamentu domisiláriu obrigatóriu ou lae,” Koordenadór CIGC hateten iha ninia knaar fatin, Villa nova, segunda ne’e.
Tuir Adolfo, maski taxa mortalidade a’as maibé provizóriumente seidauk iha faktu ruma kona-ba situasaun iha Quelicai katak iha relasaun ho COVID-19, ne’ebé rezulta óbitu nain-54 iha inísiu setembru ne’e.
Notísia relevante: Ekipa konjunta hahú investiga kauza óbitu na’in-54 iha Quelicai
Nune’e, atividade movimentu komunidade tama-sai iha postu Quelicai daudaun ne’e kontinua la’o normál hodi hein rezultadu analiza laboratóriu.
CIGC Baucau kontinua koordena ho nasionál inklui autoridade munisipál atu buka solusaun kona-ba situasaun iha Quelicai inklui informa kona-ba meiu prevensaun COVID-19 hanesan hakbesik-an ba fasilidade saúde bainhira iha sintoma ruma inklui husu komunidade atu partisipa másimu iha kampaña vasinasaun.
Daudaun ne’e ekipa konjunta diretamente iha ona terrenu atu aproxima ho família óbitu inklui komunidade iha área Quelicai atu voluntáriamente hola parte iha restreiu kontaktu, swab no rapid test.
Ekipa mós sei investiga ho família óbitu kona-ba kauza loloos hosi óbitu na’in-54 nia mate, hanesan rekolla informasaun matebian iha sintoma COVID-19 ou lae.
Ekipa konjunta ne’ebé kompostu hosi nasionál, saúde munisipál, seguransa, autoridade postu Quelicai no CIGC rasik sei finaliza servisu durante loron-tolu molok hato’o rezultadu analiza ba nasionál.
Jornalista : Natalino Belo
Editora : Julia Chatarina
